Jylýǵa jarymaǵan Rıdder: Jylý elektr ortalyǵynda jıi apat bolýyna ne sebep
Alǵashqy aqaý qazanda shyqty
Kenshiler qalasynyń halqyn tolǵandyryp otyrǵan jylý máselesiniń tolyqqandy sheshimin tappaı kele jatqanyna birneshe aıdyń júzi boldy. Eń alǵash ret jylý elektr ortalyǵyndaǵy aqaý ótken jyldyń qazan aıynda shyqqan.
Naqty aıtqanda, 23 qazanda ortalyqtaǵy qazandyqtar jumysyn toqtatyp, úıler jylýsyz qalǵan. Shahar ákimi Dmıtrıı Gorkovoı oqıǵa ornyna baryp, tıisti sharalardy qabyldap jatqandyqtaryn aıtyp turǵyndardy sabyrǵa shaqyrdy.
24 qazanda Shyǵys Qazaqstan oblysynyń ákimdigi Rıdderdegi jylý elektr ortalyǵyndaǵy tótenshe jaǵdaı sapasyz mazýt saldarynan bolǵanyn málim etti.
«JEO basshylyǵynyń salǵyrttyǵynan mazýt durys tekserilmegen. Belgili bolǵandaı, oǵan sý qosylǵan. Ortalyqqa «Qaztsınk» JShS-dan, Óskemendegi JEO-dan mazýt jóneltildi. Osynyń nátıjesinde, ortalyq 100 kún úzdiksiz jumys isteıtin otynmen qamtamasyz etiledi», - delingen sol kezdegi aqparatta.
Sol kúni turǵyn úıler men áleýmettik nysandar jylýmen qamtamasyz etile bastady. Ortalyqqa jetkizilgen mazýttyń jalpy kólemi 190 tonnany qurady.
Biraq qazan aıynyń sońynda halyq qaıtadan jylýsyz qaldy. Belgili bolǵandaı, jylý elektr ortalyǵynda qazandyqtardyń biri isten shyqqan. Qarashanyń 1-i kúni ákimdikten úılerdiń jylýǵa qosylǵany týraly aqparat berildi.
5 qarasha kúni saǵat 20.00-de ortalyqtaǵy kúl shyǵarý júıesindegi sorǵy isten shyǵyp, №1 qazandyq agregatynyń qosalqy jabdyǵy apatty jaǵdaıda ajyratyldy. Sonyń saldarynan jylý tasyǵyshtyń temperatýrasy +39°S deıin tómendedi (qalypty temperatýra mólsheri +70°S). Rıdder qalasynyń 22 myńnan astam abonenti úshin jylý berý azaıtyldy.
«Tabıǵı jáne tehnogendik sıpattaǵy tótenshe jaǵdaılardyń synyptamasyn belgileý týraly» Qazaqstan Respýblıkasy Úkimetiniń 2014 jylǵy 2 shildedegi № 756 qaýlysyna sáıkes bul apattyq jaǵdaı jergilikti aýqymdaǵy tótenshe jaǵdaı retinde jikteledi. Jaǵdaı erekshe baqylaýda. Rıdder qalasyn jylýmen jabdyqtaýdy qalpyna keltirý boıynsha barlyq qajetti sharalar qabyldanýda», - degen edi oblys ákimi Danıal Ahmetov.
Tótenshe jaǵdaıǵa oraı Rıdder qalasynyń bilim bólimi basshysy mindetin atqarýshynyń buıryǵymen 7-11 qarasha aralyǵynda mektep oqýshylary qashyqtan oqytý formatyna kóshti. Osy ýaqyt ishinde qalanyń mektepke deıingi mekemeleri óz jumysyn toqtatty.
Jóndeý jumystary júrgizildi
Óńirdiń iri ónerkásiptik jáne kommýnaldyq kásiporyndarynyń qyzmetkerleri JEO-nyń jumysyn qalypqa keltirý úshin ony birqatar ýchaskege bóldi. Árbir maman óz ýchaskesinde jabdyqtyń jaı-kúıine aýdıt júrgizip, qajetti jumystar boıynsha usynystar aıtty. ShQO ákimdiginiń málimetinshe, «Rıdder JEO» basshylyǵy jabdyqtar jumysyndaǵy aqaýlardy anyqtaý úshin esh shara qoldanbaǵandyqtan «Kaztsınk» JShS, «Óskemen jylý jelileri» AQ, «Óskemen JEO», «Kazvzryvprom», ShQ AEK-den shaqyrylǵan mamandarǵa olardyń jumysyn isteýge týra kelgen.
8 qarasha kúni túske qaraı 3 qazandyq iske qosylyp, júıede temperatýra 57 gradýsqa deıin kóterildi. Alaıda kóp uzamaı ortalyqta taǵy da aqaý shyqqan.
«9 qarashada jylý elektr ortalyǵyndaǵy №6 joǵary qysymdy qazandyq iske qosylǵan bolatyn. 10 qarasha kúni túngi saǵat 01:00-de temperatýrasy 65 gradýsqa jetken №6 qazandyq apatty jaǵdaıda sóndirildi. Birden jóndeý jumystary bastalyp ketti», - dedi sol kezde qala ákimi Dmıtrıı Gorkovoı.
Kelesi kúni qazandyq qaıta qalpyna keltirildi. Sodan soń qazandyq iske qosylyp, jylý bere bastady.
14 qarashada Rıdderdegi tótenshe jaǵdaı boıynsha qurylǵan jedel shtab ókilderi jylý elektr ortalyǵyndaǵy jóndeý-qalpyna keltirý jumystary kestege sáıkes júrgizilip jatqanyn habarlady.
«Ortalyqtaǵy agregattardy retteý úshin Óskemen jáne Sogra JEO energetıkteri men arnaıy mamandary keldi. №1, № 3 ortasha qysymdy qazandyq jáne joǵary qysymdy №6 qazandyq jumys istep tur. Joǵary qysymdy № 4 qazandyqty avtomattandyrý boıynsha jóndeý jumystary júrgizilýde. Jýyq arada osy agregatty qalpyna keltirý jumystary aıaqtalady», - delingen edi aqparatta.
23 qarasha kúni ortalyqtaǵy eki qazandyq áli jóndelip jatqany málim boldy. Arada bir apta ótken soń jóndeý jumystaryna reseılik mamandar tartylǵany habarlandy.
Úıler qaıta sýyp ketti
Dese de 1 jeltoqsanda Rıdder halqynyń úıleri qaıta sýyp ketken. Tótenshe jaǵdaı jónindegi jedel shtab ókilderi munyń sebebin túsindirdi.
«Jylý elektr ortalyǵy sýdy Gromotýha ózeninen alady. Ózendegi «Lenınogorsk» SES ýchaskesinde qabyrshaq muz jınalýyna baılanysty osyndaı jaǵdaı bolyp otyr. Qala turǵyndary bul tabıǵı qubylysty burynnan jaqsy biledi. Ózendi tazartý boıynsha barlyq qajetti jumystardy SES qyzmetkerleri júrgizip jatyr. Jaǵdaı turaqtanyp keledi», - delingen habarlamada.
Jeltoqsan aıynyń ortasynda ShQO ákimi Danıal Ahmetov qalalar men aýdandardyń ákimderimen jylý máselesi boıynsha jınalys ótkizdi. Oǵan Energetıka mınıstrligi Atomdyq jáne energetıkalyq qadaǵalaý men baqylaý komıteti aýmaqtyq departamentiniń ókili qatysty. Belgili bolǵandaı, sáýir aıynan qyrkúıekke deıingi aralyqta osy vedomstvonyń mamandary Rıdder jylý elektr ortalyǵyna barmaǵan.
«Alaıda 15 qyrkúıekte olar mınıstrlikke hat joldap, ortalyqtyń jylytý maýsymyna tolyq daıyn ekendigi týraly habarlady. Búginde departament Rıdder JEO basshylyǵy 4 jáne 5 qazandyq agregattarynyń jóndelgeni týraly teris aqparat joldaǵanyn málimdep otyr. Osydan-aq atalǵan vedomstvo ózderiniń dármensizdigi men nemquraılylyǵyn kórsetti deýge bolady. Ózge energetıkalyq obektilerdi de qalaı tekserip, baǵa beretini kúmán týdyrady. Departament mamandarynyń áreketsizdiginen búkil qala qys mezgilinde jylýsyz qalý qaýpine ushyrady. Mundaı nemquraıly sheneýnikter memlekettik qyzmette bolmaýy kerek. Mınıstrlik tıisti shara qabyldaıdy degen oıdamyn», - dedi aımaq basshysy.
Qańtar aıynyń basynda JEO-da kezekti apat boldy. Bul joly bager stantsııasy sý astynda qalǵan.
«Dál osyndaı jaǵdaı ótken jyldyń 5 qarashasynda bolǵan. Sol kezde merdiger uıymdardyń qyzmetkerleri mazýtty soryp alyp, barlyq agregattardyń jumysyn qalpyna keltirgen edi. Alaıda, JEO basshylyǵynyń kinásinen jaǵdaı taǵy qaıtalandy. Qazir bager stantsııasynda apatty joıý jumystary júrgizilýde», - dedi sol sátte Danıal Ahmetov.
Tsehta órt shyqty
Kesapat tek sýdan emes, órtten de keldi. 19 qańtarda saǵat 06:54-te jylý elektr ortalyǵyndaǵy otynmen qamtamasyz etý tsehy órtengen. Birneshe saǵat ishinde tilsiz jaý tolyqtaı aýyzdyqtaldy. Abyroı bolǵanda, eshkim zardap shekken joq. Otynmen qamtamasyz etýdi qalpyna keltirý jumystary da shuǵyl túrde bastalyp ketti.
Oblys ákimdiginiń málimetinshe, ortalyq basshylyǵyna qatysty turǵyndar tarapynan aryz-shaǵym kúrt kóbeıdi. Soǵan oraı aımaq basshysy JEO-ny kommýnaldyq menshikke berý týraly bastamany birneshe ret kótergen. Óz sózinde Danıal Ahmetov Rıdder halqynan keshirim surady.
«Jylý temperatýrasy tómendep ketkeni úshin Rıdder halqynan keshirim suraımyn. Bul turǵyndar úshin tikeleı mańyzdy osyndaı nysan ıeleriniń olqylyqtaryna jol berip otyrǵan zańdaǵy kemshilikterden týyndady deýge de bolady. Prezıdenttiń tapsyrmasymen quzyrly mınıstrlik tarapynan zańǵa ózgerister engizilip, bizge JEO jumystaryn talapqa sáıkes baqylaýǵa múmkindik bolady dep senemin», - dedi ol.
Ákimniń aıtýynsha, ortalyq basshylyǵynyń jaýapsyzdyǵynan osyndaı oqıǵalar bolyp jatyr. Olar 4 jyl boıy eshteńe istemegen. Memlekettik organdardy jalǵan anyqtamalarmen aldap keldi.
«Ótken jyldyń qarasha aıynan beri ortalyqta apatty jaǵdaılar birinen soń biri boldy. Bager sorǵysyn eki ret sý basty, elektrmen jabdyqtaýda aqaýlar shyqty. JEO-da birinshi apatqa deıin memleket talap etetin 75 jumysshynyń ornyna 29 adam ǵana jumys istegen. Qazir onda 150-ge jýyq adam táýlik boıy eńbek etýde», - dedi oblys ákimi.
Resmı derekke súıensek, jylý elektr ortalyǵyndaǵy jabdyqtardyń 74,5 paıyzy tozǵan. Eki qazandyqty jóndeý aldaǵy ýaqytta josparlanyp otyr, apatty jaǵdaıda dep tanylǵan olar rezervte bolady.
Qazirgi ýaqytta quqyq qorǵaý organdary JEO basshylyǵyna qatysty tergeý júrgizýde. Ortalyqtyń bolashaǵy sonyń nátıjesinen keıin belgili bolmaq.