Jylý jınaýmen kúres: Mektepter bıýdjetti ashyq kórsetýge mindetteldi
ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy kúres agenttigi mektep dırektorlaryn bıýdjetti ashyq kórsetýge úndedi, dep xabarlaıdy QazAqparat tilshisi.
Sybaılas jemqorlyqqa qarsy saıasat departamentiniń dırektory Danııar Sabyrbaevtyń aıtýynsha, jańa oqý jyly bastalǵaly beri mektepterde ata-analardan aqsha jınaýǵa qatysty aryz-shaǵymdar kóptep túsýde. Osyǵan baılanysty agenttik pen mınıstrlik naqty usynystardy ázirledi.
«Biz mektep basshylary men jergilikti bılikke bir apta berip otyrmyz. Osy ýaqyttyń ishinde olar óz bıýdjetterin ashyq kórsetýge mindetti. Búginde keıbir mektepter óz bıýdjetterin jarııalady. Osy tájirıbeni barlyǵyna taratýymyz qajet. Ata-analar mekteptiń nómiri men ataýyn engizip, ǵalamtor arqyly óz mektebiniń bıýdjetin kórip otyrý tıis. Sonyń bárin ashyq jarııalaý qajet», - dedi D.Sabyrbaev Astanada ótken sharada.
Aıta keteıik, búgin QR Memlekettik qyzmet isteri jáne sybaılas jemqorlyqqa qarsy kúres agenttigi mektep dırektorlaryna eskertý jasady. Sebebi búginde san alýan testiler úshin mektep oqýshylarynan aqshany jıi jınaıdy.
«Biz ulttyq biryńǵaı testileýge daıyndyq sharalary jaıynda aıtyp otyrǵan joqpyz. Ondaı testilerdi 10-11 synyptarda ótkizedi. Alaıda, búginde keıbir daıyndyq testilerin 9-synyptan, tipti 4-synyptan bastap uıymdastyryp jatady. Sol úshin aqsha jınaıdy. Biz kimniń jáne qalaı aqsha jınaıtynyn bilemiz. Biraq aldyn ala eskertý jasap otyrmyz. Ondaı kásip - zańsyz. Aqsha jınaý tyıylmasa, tıisti sharalardy qolǵa alamyz» , - deıdi D.Sabyrbaev.
