Jylý stantsııasyn «mınalaǵan» Sátbaev turǵyny eki jylǵa sottaldy

SÁTBAEV. QazAqparat – Ulytaý oblysynyń Sátbaev qalasynda kásiporynǵa mına qoıylǵany jóninde jalǵan habar bergen turǵyn eki jylǵa sottaldy, dep habarlaıdy QazAqparat Polisia.kz-ke silteme jasap.

«2022 jylǵy 20 jeltoqsanda Sátbaev qalalyq polıtsııa bóliminiń «102» pýltine belgisiz adam qońyraý shalyp, jylý stantsııasy ǵımaratyna jarylys zat qoıylǵany týraly habarlady.

Bul fakti QR Qylmystyq kodeksiniń 273-baby (Terrorızm aktisi týraly kórineý jalǵan habarlaý) boıynsha tirkeldi.

Oqıǵa ornyna polıtsııa jáne arnaýly qyzmet mamandary baryp, tekserdi. Habarlama rastalmady.

Jedel-izdestirý is-sharalary barysynda kúdikti anyqtalyp, ustaldy. Ol mas kúıde jalǵan habarlaǵan Sátbaev qalasynyń 27 jastaǵy turǵyny bolyp shyqty», - delingen aqparatta.

Polıtsııa málimetinshe, er adam kinásin moıyndaǵan. Ol jubaıymen janjaldasyp qalǵannan keıin ishimdik iship, polıtsııaǵa mına týraly qońyraý shalǵan.

Tergeý nátıjeleri boıynsha qylmystyq is sotqa jiberildi.

Sot er adamǵa taǵylǵan aıyp tolyq dáleldendi degen sheshim shyǵaryp, ony eki jylǵa bas bostandyǵynan aıyrýǵa úkim etti.

«Jazasyn qaýipsizdigi ortasha qylmystyq-atqarý júıesi mekemesinde óteıdi. Ulytaý oblystyq Polıtsııa departamenti terrorızm aktisi týraly kórineý jalǵan habarlaǵany úshin jaýapkershilik týraly eskertedi. Ol úshin 5 jylǵa deıin bas bostandyǵynan aıyrý túrindegi jaza qarastyrylǵan», - dedi polıtsııadan.