Jylý maýsymy: 2 mln-nan astam turǵyn úı ıesine órt qaýipsizdigi túsindiriledi

NUR-SULTAN. QazAqparat – Qazaqstanda órt saldarynan adamnyń mert bolý kórsetkishi ósken. Bul týraly QR TJM órtke qarsy qyzmet komıteti basqarmasynyń basshysy Erlan Tóregeldıev málim etti, dep habarlaıdy QazAqparat tilshisi.

«Jylý berý maýsymy qarsańynda órt qaýipsizdigi aktsııasynyń 1-shi kezeńi uıymdastyryldy. Atalǵan shara barlyq óńirde 15 tamyz ben 15 qyrkúıek aralyǵynda ótti. Aktsııaǵa bizdiń mamandarmen qatar áleýmettik qorǵaý, bilim berý jáne densaýlyq saqtaý organdarynyń ókilderi de atsalysty. Búginde TJM qyzmetkerleri elimiz boıynsha 66 000-nan astam turǵyn úıdi aralap shyqty. Osy oraıda 2000 úıdiń turǵyny órt qaýipsizdigi tekserisi men keńesten bas tartty. Jalpy 195 000 azamatqa órt qaýipsizdigi boıynsha nusqaý berildi. Odan bólek, 18 myńǵa jýyq turǵyn úıden 41 000 órt qaýipsizdigi talaptaryn buzý faktisi anyqtalyp, onyń 12 000-nan astamy sol jerde joıyldy»,- dedi E. Tóregeldıev OKQ-de ótken baspasóz máslıhatynda.

Onyń aıtýynsha, áleýmettik osal topqa jatatyn 107 myńan astam otbasynyń turǵyn úıi esepke qoıyldy.

«15 qyrkúıek 15 qazan aralyǵynda órt qaýipsizdigi aktsııasynyń II kezeńi ótkiziledi. Ótken jylytý maýsymy kezindegi tájirıbe kórsetkendeı, órt qaýipsizdigi sharasy aldymen avtonomdy jylytý júıesine qosylǵan turǵyn úı ıelerine túsindiriledi. Sondaı-aq, áleýmettik osal topqa jatatyn otbasylardyń turǵyn úılerine barý jumysy jalǵasady. Osy oraıda órt qaýpiniń aldyn alý sharasy úılerdi aralap, úgit-nasıhat materıaldaryn taratýmen ǵana shektelmeıdi. Órt qaýipsizdigin buzyp otyrǵan turǵyn úıleri anyqtalyp, tıisti shara qoldanylatyn bolady. Jalpy jyl sońyna deıin 2 mln-nan astam jeke turǵyn úıdi aralaýdy josparlap otyrmyz», - deıdi ol.

TJM ókili bergen málimetke súıensek, jaz mezgilinde jeke turǵyn úılerde 2 myńnan astam datchık ornatyldy.

Buǵan deıin E. Tóregeldıev elimizde órt kezinde qaza tapqandar qatary 20 paıyzǵa artqanyn aıtty.