Jylý energııa tarıfin belgileý saıasaty qaıta qarala ma

ASTANA. QazAqparat – Áleýmettik osal tutynýshylardy jylýmen qamtý úshin tikeleı bıýdjettik qoldaý tetigi qoldanylmaq. Bul týraly Májiliste «Jylý energetıkasy týraly» jańa zań jobasyn tanystyrǵan Energetıka mınıstri Almasadam Sátqalıev aıtty, dep habarlaıdy QazAqparat tilshisi.

«Zań jobasynyń bastapqy nusqasynda tabıǵı monopolııalar sýbektileriniń barlyq negizdelgen shyǵyndaryn eskeretin tarıftik ádistemeni bekitý fýnktsııalaryn Energetıka mınıstrliginiń ókilettigine berý arqyly salanyń jaı-kúıin jaqsartý jáne ınvestıtsııalyq tartymdylyqty arttyrý úshin jylý energetıkasy salasyndaǵy tarıf belgileý saıasatyn qaıta qaraý kózdelgenin atap ótý qajet. Alaıda, kelisý barysynda bul normalardy tabıǵı monopolııalar salasyndaǵy ýákiletti organ qoldamady. Bul rette, atalǵan joba tarıftik retteýdiń naqty ári tolyq qaǵıdattaryn jáne jylý energııasyna retteletin tarıfter sáıkes kelýi tıis ólshemsharttardy, atap aıtqanda tarıftik ádistemeni jetildirý, ekonomıkalyq negizdelgen tarıfti qamtamasyz etý, ınvestıtsııalar tartý múmkindigin belgileıdi», - dedi mınıstr.

Onyń aıtýynsha, jylý energııasyna tarıfterdi ekonomıkalyq negizdelgen deńgeıge keltirý jáne halyq arasynda áleýmettik shıelenisti týǵyzbaý maqsatynda jylýmen jabdyqtaý sýbektilerin emes, osal tutynýshylardy tikeleı bıýdjettik qoldaýdy júzege asyrý tetigi kózdelgen Bul mehanızm ınvestıtsııalardy tartýǵa, sondaı-aq jylýmen jabdyqtaýdyń senimdiligi men sapasyn arttyrýǵa múmkindik beredi.

«Budan basqa, zań jobasy energııa tıimdiligin arttyrý, jańartylatyn energııa kózderin ortalyqtandyrylǵan jylýmen jabdyqtaý júıesine engizýdiń ekonomıkalyq jáne tehnıkalyq oryndylyǵy jaǵdaıynda damytýǵa yntalandyrý, salany, onyń ishinde paıdalanylatyn otyn bóliginde monıtorıng quraldaryn engizý bóliginde normalardy kózdeıdi», - dedi Almasadam Sátqalıev.