Jylý energetıkasy salasyndaǵy quzyretter bólinbek
«Jylý energetıkasy týraly» jańa zań jobasy Azııa damý banki jumyldyrǵan halyqaralyq sarapshylardyń tehnıkalyq qoldaýymen ázirlendi. Ózderińiz biletindeı, búgingi tańda «Jylý energetıkasy týraly» jeke salalyq zań joq. Bul zańnamada oryn alyp otyrǵan olqylyqtarǵa jáne osy salada strategııalyq maqsattar men damý josparlarynyń, salanyń ınvestıtsııalyq tartymdylyǵynyń, kásiporyndardyń tıimdiliginiń bolmaýy sııaqty kóptegen problemalardyń týyndaýyna ákeldi», - dedi mınıstr.
Onyń atap ótýinshe, osy máselelerdi retteý maqsatynda mınıstrlik Azııa damý banki tartqan halyqaralyq sarapshylardyń tehnıkalyq qoldaýymen atalǵan zań jobasyn ázirledi.
«Energetıka mınıstrligine qazirgi ýaqytta Indýstrııa jáne ınfraqurylymdyq damý mınıstrligi júzege asyratyn jylý energııasyn tasymaldaý fýnktsııasy bekitiledi. Óz kezeginde Indýstrııa jáne ınfraqurylymdyq damý mınıstrligi turǵyn úı-kommýnaldyq sharýashylyqqa kiretin jylý energııasyn úıishilik tutyný bóliginde jylýmen jabdyqtaý júıelerine jaýapty bolady. Sonymen qatar, zań jobasynda jylý jelilerin baqylaý fýnktsııalarynyń jergilikti atqarýshy organdardan Atom jáne energetıkalyq qadaǵalaý men baqylaý komıtetine aýysýyn kózdeıtin norma qarastyrylǵan», - dedi Almasadam Sátqalıev.
Mınıstrdiń aıtýynsha, zańnyń negizgi aspektisi jańa quraldy – jylý energetıkasyn damytýdyń master-josparyn engizý. Master-jospar aýmaqtardy damytý, turǵyn úı qurylysy, halyq sanynyń serpini, ónerkásipti damytý josparlary men baǵdarlamalarymen jáne basqa da faktorlarmen ózara baılanysty jylý energetıkasynyń josparly údemeli damýyn qamtamasyz etýge arnalǵan.
«Aıta ketý kerek, master-josparlar eldi mekenderdiń tehnıkalyq bóligi boıynsha damýyn eskere otyryp, jylý jelileriniń damýyn jáne jylý kózderiniń qajetti jylý qýatyn ǵana emes, sonymen qatar osy máseleniń ekonomıkalyq jaǵyn da eskeretin bolady. Jylý energetıkasyn damytýdyń master-josparlary jergilikti atqarýshy organ deńgeıinde ázirlenedi jáne bekitildi. Osy tetikti synaqtan ótkizý aıasynda Azııalyq damý banki jumyldyrǵan halyqaralyq sarapshylar búginde Qaraǵandy oblysy Shahtınsk qalasynyń master-josparyn ázirleý boıynsha pılottyq jobany iske asyrdy», -- dedi ol.
