Jylý elektr stantsııalaryna aıyppul salatyn zań jobasy Májiliske engizildi

ASTANA. QazAqparat – Elektr stantsııalary men qazandyqtarda otyn qorynyń jetkiliksizdiginen tótenshe jaǵdaı týyndasa nemese isten shyǵý bolsa, mekeme basshylyǵyna 345 myńnan – 6,9 mln teńgege deıin aıyppul salynady. Bul týraly Májilistiń qaraýyna berilgen «QR Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zań jobasynda jazylǵan, dep habarlaıdy QazAqparat tilshisi.

Depýtattardyń talqylaýyna usynylǵan qujatta Ákimshilik kodekske «Kúzgi-qysqy jaǵdaılarda jylý elektr stantsııalary men qazandyqtardyń otyn qorynyń bekitilgen normatıvterin saqtamaýy» týraly 300-2 baby engiziletini kórsetilgen. Oǵan sáıkes

«Elektr stantsııasy men qazandyqtyń tómendetilgen parametrlerdegi jumysy saldarynan avarııalarǵa nemese ózge de tótenshe jaǵdaılarǵa ákep soqqan jylý elektr stantsııalary men qazandyqtardyń otyn qorynyń bekitilgen normatıvterin saqtamaýy: shaǵyn kásipkerlik sýbektilerine – 100 (1 AEK – 3450 teńge), orta kásipkerlik sýbektilerine – 500, iri kásipkerlik sýbektilerine – 1000 AEK mólsherinde aıyppul salýǵa ákep soǵady.

Elektr stantsııasy men qazandyqtyń negizgi jabdyqtarynyń toqtaýyna ákep soqqan jylý elektr stantsııalary men qazandyqtardyń otyn qorynyń bekitilgen normatıvterin saqtamaýy: shaǵyn kásipkerlik sýbektilerine – 200, orta kásipkerlik sýbektilerine – 1 000, iri kásipkerlik sýbektilerine – 2 000 AEK kórsetkish mólsherinde aıyppul salýǵa ákep soǵady», - delingen jańa bapta.

Qujattyń túsindirmesinde kórsetilgendeı, QR Ákimshilik quqyq buzýshylyq týraly kodeksine mundaı ózgeris otyn tapshylyǵynan týyndaǵan tótenshe jaǵdaılardyń aldyn alý maqsatynda engizilip otyr.

«Bul – energııa óndirýshi uıymdarda elektr stantsııalarynyń toqtap qalýyna nemese tómendetilgen parametrlerde jumys isteýine ákep soqtyratyn otyn tapshylyǵynan týyndaǵan tótenshe jaǵdaılardyń aldyn alý maqsatynda usynylady», - dep túsindirme berilgen engizilgeli otyrǵan bapqa.

Aıta keteıik, qoldanystaǵy zańnamada mundaı baǵyttaǵy quqyqbuzýshylyq áreketterine jol bergen bıznes sýbektilerin jaýapkershilikke tartatyn norma joq.