Jylý elektr ortalyqtaryn jóndeýge 90 mlrd teńge jetpeı tur – mınıstrlik

ASTANA. QazAqparat – Elimizdegi jylý elektr ortalyqtarynyń qyzmetin taldaý jumysy aıaqtaldy, onyń nátıjesi kelesi aıda jarııalanady. Bul týraly Energetıka vıtse-mınıstri Jandos Nurmaǵanbetov málim etti, dep habarlaıdy QazAqparat tilshisi.

«Ekibastuzda bolǵan apattan keıin komıssııa quryldy. Komıssııa tapsyrmasyna sáıkes búkil jylý elektr ortalyqtarynyń jaǵdaıyna taldaý jasaldy. Taldaý negizinen qarjynyń jumsalýy jáne jóndeý jumystaryna qatysty boldy. Jalpy elimizdegi jylý elektr ortalyqtaryn jóndeýge 180 mlrd teńge qarjy talap etilse, sonyń ishinde 90 mlrd teńge jetpeı tur. Qalǵan qarjyny bireý salýy kerek qoı. Elektr energııasy týraly zańǵa sáıkes jetpegen qarjyny tutynýshy tóleıdi nemese bıýdjet qarjysynan óteledi. Al bıýdjetten jeke menshik ıesine qarjy bólinbeıdi», – dedi Jandos Nurmaǵanbetov Parlament Senaty qarjy jáne bıýdjet komıtetiniń otyrysynda.

Onyń aıtýynsha, eger JEO ıelerine qalǵan aqshany sal dese, olar quıylǵan qarjynyń paıda ákelmeıtindigin alǵa tartady.

«Másele kúrdeli. Bir joly - tarıfti kóterý, ıaǵnı aldaǵy 5-7 jyl boıy birte-birte ósirý. Sonda menshik ıesiniń de jumys isteýge nıeti bolady. Sonymen qatar biz JEO ıelerine ashyq bdıýjet talabyn qoıyp otyrmyz. Kez kelgen adam qarjynyń qaıda jáne qansha kólemde jumsalyp jatqanyn bile alý múmkindigi. Jumsalǵan qarjy ashyq kórsetilse, artyq suraq týyndamaıdy. Búginde JEO-na taldaý jumysyn aıaqtadyq, kóp aqparat jınaldy. Onyń nátıjesin kelesi aıta jarııalaımyz», - deıdi ol.

Eske sala ketsek, bıyl qańtarda Premer-Mınıstr Álıhan Smaıylov elimizdegi jylý elektr ortalyqtary jelisi aldaǵy 2-3 jyl ishinde qaıta jańartylady degen edi.