Jylý berý maýsymyna daıyndyǵy tómen óńirler ataldy

NUR-SULTAN. QazAqparat – Elimizdegi bilim berý nysandarynyń 99 paıyzy jylý berý maýsymyna daıyn. Bul týraly Indýstrııa jáne ınfraqurylymdyq damý mınıstri Qaıyrbek Óskenbaev Úkimet otyrysynda aıtty, dep habarlaıdy QazAqparat tilshisi.

«Aldaǵy 2022-2023 jyldardaǵy jylý berý maýsymyna sapaly jáne ýaqytyly daıyndalý maqsatynda mınıstrlik jumys josparyn bekitti. Oǵan sáıkes oblystardyń, Nur-Sultan, Almaty jáne Shymkent qalalarynyń ákimdikteri 2022 jylǵy 1 qyrkúıekke deıin bilim berý obektileriniń 100% daıyndyǵyn qamtamasyz etýi tıis. Sonymen qatar, 2022 jylǵy 15 qazanǵa deıin kommýnaldyq sharýashylyqtyń, áleýmettik salanyń, turǵyn úılerdiń tolyq daıyndyǵyn jáne barlyq avtonomdy jylý kózderin otynnyń normatıvtik qorymen qamtamasyz etýi qajet. Bıylǵy 1 qyrkúıektegi jaǵdaı boıynsha, 11 157 bilim berý obektisiniń 11 075-i nemese jospardyń 99 paıyzy jylý berý maýsymyna daıyn», - dedi Q.Óskenbaev.

Onyń aıtýynsha, bilim berý nysandarynyń daıyndyǵy boıynsha Nur-Sultan qalasynda, Jambyl jáne Soltústik Qazaqstan oblystarynda tómen qarqyn baıqalyp otyr. Atalǵan óńirler ákimdikteri bilim berý obektileriniń 100% daıyndyǵyn qamtamasyz etýde shuǵyl sharalar qabyldaýy qajet.

«Jalpy, bıyl 5 674 densaýlyq saqtaý nysanyn daıyndaý josparlanyp otyr. Onyń ishinde búginde 5 566-sy nemese 98 paıyzy daıyn. Basqa óńirlermen salystyrǵanda daıyndyqtyń tómen deńgeıi Nur-Sultan qalasynda (84%, 43-ten 36), Aqmola (91%, 551-den 503) Atyraý (92%, 144-ten 132) oblystarynda baıqalyp otyr», - dedi mınıstr.