Jylqyny kólikpen ádeıi basqan júrgizýshige qatysty ákimdik túsinikteme berdi
«Іle aýdanynda jol talǵamaıtyn kólikpen jylqyny ádeıi basqan oqıǵa shildeniń 16-da bolǵan. Qazir júrgizýshige qatysty QR Qylmystyq kodeksiniń 316-baby «Janýarlarǵa qatygezdik jasaý» deregi boıynsha is qozǵaldy. Oblystyq polıtsııa departamentiniń baspasóz qyzmeti oqıǵa basshylyqtyń nazaryna alynǵanyn jetkizdi»,- dep jazdy óziniń Facebook-tegi paraqshasynda Almaty oblysy ákiminiń baspasóz qyzmetiniń jetekshisi Ǵalymurat Júkel.
Aıta keteıik, er adamnyń jol talǵamaıtyn kólikpen jylqyny qasaqana túrde basyp jatqan vıdeosy jelige taraaǵan bolatyn. Vıdeo avtory jylqyny basqan adamdy polıtsııa alyp ketip, artynsha bostandyqqa jibere salǵandyǵyna shaǵymdanady.
«Myna jigit keshe bizdiń jylqymyzdy kólikpen basqan. Keshe túnde polıtsııa alyp ketken. Al búgin bostandyqta júr. Bul ne masqara!» - deıdi vıdeoǵa túsirip turǵan avtor.
Al polıtsııa kúdiktiniń arnaıy qolhatpen bosatylǵanyn habarlady.
«16 shilde kúni Іle aýdanyndaǵy Mejdýrechınsk aýylynyń 38 jastaǵy turǵyny kórshisimen janjaldasyp, onyń jylqysyn qasaqana túrde jol talǵamaıtyn kólikpen basqan. Qazir kúdiktiniń ústinen QR QK 316 baby (Janýarlarǵa qatygezdik jasaý) boıynsha is qozǵaldy. Arnaıy qolhatpen bosatyldy», - delingen Almaty oblystyq polıtsııa departamenti baspasóz qyzmetiniń habarlamasynda.