Jylqyny qaqqan kólik júrgizýshisi es-tússiz jatyr - Almaty oblysy
TALDYQORǴAN. QazAqparat - Almaty oblysynda 6 jylqyny kólikpen qaǵyp ketken júrgizýshi es-tússiz jatyr. 1995 jylǵy azamattyń mıyna jáne ókpesine qan ketken, baýyry jarylǵan, - dep habarlaıdy QazAqparat tilshisi.
Qaratal aýdandyq aýrýhanasynyń bas dárigeri Birjan Qumarovtyń aıtýynsha, qazir naýqas jan saqtaý bóliminde. Jaǵdaıy óte aýyr. Ókpesine, mıyna qan ketkendikten oǵan shuǵyl túrde operatsııa jasalǵan. Kólikti tizgindegen júrgizýshiniń baýyry jarylyp, 6 qabyrǵasy da synǵan. Qazir 1995 jylǵy azamatqa arnaıy tynys alý apparaty qosylǵan. Al jol kólik oqıǵasy kezinde kólik ishinde bolǵan jolaýshynyń jaǵdaıy ortasha deıdi, dáriger. 1999 jylǵy jigit bas-mı jaraqatyn alǵan. Eki qabyrǵasy synǵan. Qazir eki naýqastyń jaǵdaıy dárigerlerdiń jiti baqylaýynda.
Esterińizge sala keteıik, biz buǵan deıin kólik júrgizýshisiniń 6 jylqyny qaǵyp ketkendigi jaıly habarlaǵan bolatynbyz . Oqıǵa Úshtóbe-Taldyqorǵan tas jolynyń 26-shy shaqyrymynda, tańǵy saǵat tórtter shamasynda bolǵan.
