Jylqy jyly qazaqqa jaıly jyl bolady - depýtat A.Smaıyl
ASTANA. 30 jeltoqsan. QazAqparat - Qazaqtyń nanym-senimi boıynsha aldaǵy jylqy jyly jaıly jyldarǵa jatady. QazAqparat tilshisine suhbat bergen QR Parlament Májilisiniń depýtaty Aldan Smaıyl osylaı aıtty.
«Qazaqtyń nanym-senimi boıynsha aýyr jyldarǵa qoıan jyly jatady ǵoı. Onyń aq qoıan jyly deıdi. Tarıhqa úńilsek, sol qoıan jyldary jut kóp bolǵan. Sosyn halqymyz meshin jylynan saqtanǵan.. Al jaıly jyldardyń ishinde osy jylan men jylqy jyly kóbirek atalady. Nege jylan jyly desem, ol salqynqandylarǵa jatady. Sondyqtan ol jyldary bári salqyn aqylmen baıyptalady, qarbalas bolmaıdy. Sonyń arqasynda asyǵys sheshimder qabyldanbaıdy. Jylqy jyly bolsa, ol ózi taza ári pák janýar ǵoı. Adamnyń boıynda izgilik pen ımandylyq kóbeıedi dep eseptelgen. Jylqy jyly berekege toly bolǵan desedi. Óıtkeni onyń súti, qymyzy, eti qandaı! Qazaqta baılyqtyń ólshemi jylqy bolǵan ǵoı. Sol sebepti jylqy jyly baılyqqa, dáýletke jeteleıdi degen yrym bar. Halqymyzda jylqy týraly kóp aıtylady. «Qazaq jylqy minezdi halyq» deıdi, sebebi jylqy baýyrmal, ıesine de, úıirine de adal. Sosyn jylqy kekshil mal emes. «Jylqy kisineskenshe, adam túsiniskenshe» degen sóz jaıdan-jaı aıtylmaǵan», - deıdi halyq qalaýlysy. Depýtattyń aıtýynsha, qazirgi jastar osyny kóp bile bermeıdi. «Bul máseleni de depýtattyq saýal retinde kóterip, mektepterde mindetti emes pán retinde engizgen jón dep oılaımyn. Sabaqqa beldi ǵalymdardy shaqyryp, aldaǵy jyldyń qasıeti týraly aıtyp jatsa, artyq bolmas edi. Sebebi onyń ózi - dástúr», - dep atap kórsetti A.Smaıyl.
