Jylqy urlaýshylarymen arada tutanǵan qaqtyǵys barysynda qazaqstandyq bir shekarashy aýyr jaralanyp, 2 ury qaza tapsa, taǵy biri qolǵa tústi
ASTANA. Shildeniń 14-i. QazAqparat /Marlan Jıembaı/ - Qazaqstan-Qyrǵyzstan shekarasynda 1 úıir jylqyny kórshi elge alyp ótpek bolǵan qyrǵyz jylqy urlaýshylarymen arada tutanǵan atys barysynda qazaqstandyq bir shekarashy aýyr jaralanyp,
2 ury qaza tapsa, taǵy biri qolǵa tústi. Bul týraly búgin elordada ótken baspasóz máslıhaty barysynda QR UQK Shekara qyzmeti dırektorynyń orynbasary Amangeldi Abylqanov málim etti.
Onyń atap ótýinshe, shildeniń 13-i kúni keshki saǵat 4-5-tiń aralyǵynda qazaqstan-qyrǵyzstan shekarasynda Shonjy shekara otrıadynyń «Saty» zastavasynyń shekara jasaǵy taý joldary arqyly Qazaqstannan kórshi elge 1 úıir jylqy aıdap bara jatqan urylardy anyqtaǵan. «Olardy toqtatyp, qujattaryn tekserý jasamaq bolǵan shekara jasaǵyna jylqy urlaýshylar birinshi bolyp qarsylyq kórsetip, oq atqan. Urys barysynda qazaqstandyq shekarashy jaralandy. Zań aıasynda áreket jasaǵan shekara jasaǵy memlekettik shekarany zańsyz buzýshylardyń jolyn kesý jáne ózderin qorǵaý maqsatynda qarý qoldandy», dep atap ótti ol.
Atys barysynda 2 qyrǵyz urysy oqıǵa ornynda qaza taýyp, 1-eýi qolǵa túsken. Qazirgi ýaqytta qolǵa túsken qyrǵyz azamaty ózderiniń memlekettik shekarany buzyp ótkendikterin jáne birinshi bolyp qarý qoldanǵandaryn moıyndap otyr.
«Aýyr jaralanǵan shekarashy shekara avıatsııasynyń tikushaǵymen Shekara qyzmetiniń ortalyq áskerı gospıtaline jetkizilip, túngi 2-de operatsııa jasaldy. Qazirgi ýaqytta onyń jaǵdaıy birqalypty aýyr dep baǵalanýda», dedi A.Abylqanov.
Memlekettik shekarany buzýshylardan 3 qarý men 20 bas jylqy tárkilendi.
