Jylqy atyp alǵan barymtashylar ustaldy
PAVLODAR. QazAqparat - «Shaldaı-Pavlodar» avtojolynda polıtsııa qyzmetkerleri reıd júrgizý kezinde tún ishinde 54 jastaǵy er adam tizgindegen «Aýdı» kóligin ustady, dep habarlaıdy pavlodarnews.kz oblystyq ІІD-niń baspasóz qyzmetine silteme jasap.
«Kóliktiń ishinde 43 jastaǵy jolaýshy bolǵan. Tekserý kezinde tártip saqshylary júksalǵyshtan tıisti qujattary joq terisimen birge jylqynyń bir bóligin jáne usaq kalıbrli «TO3-8» markaly qarý, kalıbri 5,6 mm eki gılza men arqan, metall kúrshek, úsh pyshaq alyp shyqty. Jaýap alǵan kezde júrgizýshi bir bas jylqyny Shyǵys Qazaqstan oblysynda jaıylym jerde belgisiz adamdardan satyp alǵanyn aıtqan», - deıdi departamentte.
Budan bólek, tergeý barysynda polıtsııa qyzmetkerleri kúdiktilerdiń Aqqýly aýdanynda jergilikti turǵynǵa tıesili bir jylqyny atyp alǵanyn anyqtady. Olar pyshaq jáne baltanyń kómegimen jylqyny bólip tastaǵan. Degenmen etti saýdaǵa jiberip úlgermegen. Kóliktiń júksalǵyshyna salyp alyp, qalaǵa bet alǵan. Kúdiktilerden ishki ister organdarynda tirkelmegen qarý alyndy.
QR QK-niń 188-baby boıynsha jáne QR QK-niń 287-babyna sáıkes oq pen qarýdy zańsyz saqtaý, tasymaldaý, satyp alý boıynsha sotqa deıingi tergeý júrgizilýde.
