«Jyldyń ulttyq sporttyq júldesi»: Aldyn ala nátıjeler belgili boldy
ASTANA. QazAqparat - QR Ulttyq Olımpıada komıteti uıymdastyrǵan «Jyldyń ulttyq sporttyq júldesi» úshin úmitkerlerge daýys berý aıaqtaldy, dep habarlaıdy «QazAqparat» HAA tilshisi.
Baıqaýdy QR Ulttyq Olımpıada komıteti men «Habar» agenttigi uıymdastyrdy.
Osy ýaqytqa deıin 200 myń daýys berilgen. QR UOK saıtynda daýystardy onlaın qabyldaý 28 qarasha kúni saǵat týra 23:59-da aıaqtaldy.
Daýys berý aıaqtalar sátte 9 nomınatsııa boıynsha nátıjeler kelesideı boldy. Atap aıtqanda, veloshabandoz Alekseı Lýtsenko, frıstaıl jáne akrobatıka boıynsha Janbota Aldabergenova, mánerlep syrǵanaýshy Elızabet Tursynbaeva, bokstan QR Ulttyq quramasynyń bas bapkerleri Myrzaǵalı Aıtjanov pen Mádiǵalı Qarsybekov, Qazaqstan trıatlon federatsııasy, Almaty qalasynyń mádenıet jáne sport basqarmasy, «Astana» FK men sadaq atýdan erler quramasy qarsylastaryna qaraǵanda eń kóp daýys jınady.
«Nátıjeler 30 qarasha kúni Astanada «Jyldyń ulttyq sporttyq júldesin» tapsyrý saltanatty rásiminde jarııalanatyn bolady», - deıdi baıqaý uıymdastyrýshylary.
