Jyldyń sońyna deıin Aqsha-kredıt saıasaty jónindegi komıtet qurylady
Memleket basshysy «aqsha-kredıt saıasatyna jańasha qaraý» mindetin aıtyp ótti.
«Qazirgi ýaqytta Ulttyq bank aqsha-kredıt saıasatynyń 2030 jylǵa deıingi strategııasyn ázirlep jatyr. Ol aqsha-kredıt saıasatyn tıimdi iske asyrýǵa kedergi keltiretin júıelik problemalardy joıýǵa yqpal etedi. Teńgege jáne júrgizilip otyrǵan saıasatqa degen senimdi arttyrady, sondaı-aq turaqty ınflıatsııany qamtamasyz etý arqyly Qazaqstan ekonomıkasyna uzaq merzimdi ınvestıtsııalar úshin boljamdy orta qalyptastyrýǵa yqpal etetin bolady»,– dedi Aqyljan Baımaǵambetov.
Valıýta naryǵynyń tıimdiligin arttyrý úshin Úkimetpen birlesip elge valıýtalyq túsimdi qaıtarýdyń qosymsha sharalary pysyqtalady jáne eksporttaýshylardyń ony iske asyrýy úshin qolaıly jaǵdaı jasalady.
Sonymen qosa, Prezıdenttiń tapsyrmasy boıynsha 2020 jyldyń sońyna deıin Ulttyq bank janynda Aqsha-kredıt saıasaty jónindegi komıtet qurylýy kerek.
«Bul organnyń basty mindeti - bazalyq stavka men onyń dáliziniń mólsheri jóninde sheshim qabyldaý. Orta merzimdi perspektıvada onyń quramyna táýelsiz músheler kiredi»,– dep tolyqtyrdy QR Ulttyq bank tóraǵasynyń orynbasary Aqyljan Baımaǵambetov.