Jyldyń sońyna deıin 1 mıllıon tonna astyq satyp alý boıynsha jumystardyń 50 paıyzdan astamy oryndaldy
Bul týraly búgin Astanada atalǵan máselege baılanysty ótken selektorlyq keńesten keıingi brıfıngte «Azyq-túlik kelisimshart korporatsııasy» AQ Astyq satyp alý departamenti dırektorynyń orynbasary Oljas Maqatov málim etti, dep habarlaıdy QazAqparat.
Aıta keteıik, bastapqyda «Azyq-túlik kelisimshart korporatsııasyna» otandyq aýyl sharýashylyǵy taýarlaryn óndirýshilerden jalpy mólsheri 5 mıllıon tonna astyq satyp alý júktelgen. Onyń 3 mıllıon tonnasy satyp alyndy.
Sonymen birge baǵdarlama aıasynda 2 mıllıon tonna astyq alý maqsaty turǵanyna toqtalǵan O. Maqatov, «osy eki mıllıonnyń bir mıllıonyn bıylǵy jyldyń aıaǵyna deıin tapsyrýymyz kerek. Al qalǵan bir mıllıon tonnany aldaǵy jyldyń birinshi toqsanynda satyp alamyz. Sondyqtan bıylǵy 1 mıllıon tonna astyqty satyp alý jumystarynda búgingi kezde 50 paıyzdan astamy oryndaldy»,-dedi.
O. Maqatovtyń sózine qaraǵanda, astyqty alýdaǵy keıbir keshigý sebepteri aýyl sharýashylyǵy taýarlaryn óndirýshiler tarapynan qujattar ýaqytyly tapsyrylmaýyna baılanysty. «Osyǵan oraı qujattar tolyq jınaqtalmaǵannan keıin biz de qarjyny aýdara almaımyz. Óıtkeni bul qarjynyń da esebi bar»,- dedi ol.
Atap aıtqanda «Azyq-túlik kelisimshart korporatsııasy» úshinshi klasty bıdaıdy satyp alýda. Bıylǵy jyl jańbyrly bolǵandyqtan, astyqtyń birshama bóliginiń sapasy tómendep, 4 klasqa jatqyzyldy.
