Jyldyń eń basty jetistikteriniń biri - jumyssyzdyq baqylaýda boldy - Úkimet basshysy
ASTANA. Jeltoqsannyń 29-y. QazAqparat /Ernur Aqanbaı/ - 2009 jyldyń eń basty jetistikteriniń biri, Qazaqstanda jumyssyzdyq baqylaýda boldy. Elimizde jumys oryndaryn jappaı qysqartýǵa jol berilmedi. Bul týraly búgin Astanada buqaralyq aqparat quraldarymen bolǵan brıfıngte Úkimet basshysy Kárim Másimov málim etti,
dep habarlaıdy QazAqparat.
«Eger 2009 jyldyń nátıjeleri jaıly aıtatyn bolsaq, halyqty ishki jalpy ónimniń ósimi sonshalyqty qyzyqtyrmaıdy. Adamdardy eń aldymen jumysy bar ma, joq pa osy másele alańdatady. Meniń oıymsha, 2009 jyldyń eń úlken jetistikteriniń biri, Memleket basshysynyń tapsyrmasy boıynsha Úkimettiń ákimdiktermen birlesip atqarǵan kúsh-jigeriniń arqasynda jumyssyzdyq baqylaýda boldy. Biz iri kásiporyndarmen jumys oryndaryn qysqartpaý týraly kelisimge keldik. Taza naryqta bul durys emes te shyǵar. Alaıda olar tolyqqandy jumys aptasyn saqtady. Biz jappaı qysqartýdy kórgenimiz joq», dedi brıfıngte Úkimet basshysy.
Premer-Mınıstrdiń aıtýynsha, «Jol kartasy» baǵdarlamasy aıasynda 150 myń jumys orny qurylyp, kadrlar qaıta oqytylyp, daıarlandy. Premer-Mınıstrdiń aıtýynsha, jyl basyndaǵymen salystyrǵanda, elimizde azyq-túlik taǵamdarynyń baǵasy ósti. Alaıda, Úkimet baǵanyń aıtarlyqtaı sharyqtaýyna jol bergen joq. «Biz ınflıatsııanyń ósimine jol bermedik. Aldyn ala málimetter boıynsha, 2009 jyly ınflıatsııa 6,3 paıyzdy quraıdy. Bul sońǵy 10 jyldaǵy eń tómengi ınflıatsııa», dedi K. Máismov.
