Jyldyń aıaǵyna deıin birneshe teatrǵa ulttyq mártebe beriledi

ASTANA. QazAqparat - Birneshe teatr ulttyq mártebe alýǵa ótinishterin tapsyrdy. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Mádenıet jáne sport mınıstrligi mádenıet jáne óner isteri departamenti dırektorynyń orynbasary Nurbolat Ahmetjanov málim etti.

«Qazirgi tańda Qazaqstanda 8 teatrymyz akademııalyq mártebege ıe. Ózderińiz bilesizder, mádenıet týraly zańnamaǵa sáıkes, akademııalyq jáne ulttyq mártebe berý erejesi bekitilgen bolatyn. Búginde akademııalyq mártebe berý QR Mádenıet jáne sport mınıstrliginiń buıryǵymen, al ulttyq mártebe Prezıdenttiń Jarlyǵymen beriledi. Atalǵan 8 teatrdyń arasynda ulttyq bıik mártebege laıyqtylary bar. Bul turǵyda olar ózderiniń ótinishterin bizge erejege sáıkes tapsyrady»,-dep toqtaldy N. Ahmetjanov.

Onyń sózine qaraǵanda, búgingi tańda 90 jyldyǵyn toılap otyrǵan M.Áýezov atyndaǵy Qazaq memlekettik akademııalyq drama teatry, Abaı atyndaǵy Qazaq memlekettik akademııalyq opera jáne balet teatry, sondaı-aq taǵy biraz teatrlar ulttyq mártebege erejege sáıkes qujattaryn tapsyryp jatyr. Osy oraıda mınıstrlik janynan tıisti komıssııa quryldy.

«Eger de atalǵan erejedegi talaptarǵa saı bolyp jatsa, bul tetrlar jyldyń aıaǵyna qaraı ulttyq mártebege ıe bolady degen oıdamyz. Teatrlarymyzdy yntalandyrý maqsatynda engizilgen erejeler boıynsha, eger teatr akademııalyq mártebede 10 jyl jumys istese, ulttyq deńgeıge ótinish berýge quqyly. Atap aıtqanda, bul baǵyttaǵy sharalar zańnama şeńberinde sheshilip jatyr»,-dep túıdi N. Ahmetjanov.