Jyldamdyqty arttyrǵan astanalyq júrgizýshilerge jyl basynan beri jarty mıllıard teńgege jýyq aıyppul salyndy
ASTANA. 31 shilde. QazAqparat - Jyl basynan beri jyldamdyqty arttyrǵany úshin astanalyq júrgizýshilerge jarty mıllıard teńgege jýyq aıypul salynǵan.
Bul týraly Astana qalasy Jol polıtsııasy basqarmasynyń baspasóz qyzmetinen habarlandy.
Basqarma málimetterine qaraǵanda, ótken 7 aıda Astanada jyldamdyq asyrýdyń 59 myń oqıǵasy tirkeldi. Soǵan oraı, jol erejesin saqtamaǵandardyń meken-jaılaryna 38,5 myń uıǵarym joldanǵan. Bul ótken jyldyń sáıkes merzimimen salystyrǵanda 12 paıyzǵa artyq. Al salynǵan aıyppuldar kólemi 467,5 mln. teńgeni qurap otyr.
«Budan bólek, qalada tártip buzýshylyqtardy tirkeıtin 55 foto jáne beıne fıksatsııa júıesi avtomattyq rejimde jumys isteıdi, sonyń ishinde kólik pen jaıaý júrginshiler kóp júretin jerlerde ornatylǵan 49 «Red speed» statsıonarlyq jyldamdyq ólsheıtin qural jáne 6 «Interga» jol qozǵalysyn baqylaý júıesi bar. Sonymen qatar, jol polıtsııasy ınspektorlary «Vızır 2M» jyljymaly jyldamdyq ólshegishterdi jıi qoldanady, bul qural jyljyp bara jatqan kóliktiń jyldamdyǵyn ólsheýge, bir ýaqytta tártip buzýshyny sýretke jáne beınekameraǵa túsirýge múmkindik beredi», delingen baspasóz baıanynda.
2013 jylǵy 7 aıdyń ishinde Astanada 324 jol-kólik oqıǵasy oryn alsa, sonyń ishinde 31-i jyldamdyqty arttyrý boıynsha. Osy keleńsiz jaǵdaıdyń saldarynan 3 adam qaza taýyp, 36 adam túrli jaraqattar aldy.
