Jylda 100 myńnan astam bala áke ne ana tárbıesinen aıyrylýda
«Qoǵamda qalyptasyp qalǵan daýdyń barlyǵy sotta sheshiledi degen sana paradıgmasyn ózgertýdiń 4 jolyn kórip tyrmyz. Birinshiden - úgit-nasıhat júrgizip, jurtqa daýdy sheshýdegi balama ádisterin úıretý. «El ishinde daý kóbeıse, el shetinde jaý kóbeıedi» aıdarymen Almatyda, Shymkentte, Aqtaýda, Atyraýda zııaly qaýymmen kezdesýler ótti. Bul bastama óte jaqsy qoldaý tapty, áli de jalǵastyramyz», - dedi ol.
Onyń atap ótýinshe, Qoǵamdyq damý mınıstrligimen birigip, medıatsııany damytýdaǵy memlekettik organdardyń is-qımyldaryn tıimdi etý jumystary bastaldy. Odan bólek Kásipodaq federatsııasymen jasalǵan memorandým aıasynda óńirlerde tatýlasý kabınetteri ashylyp, nasıhat jumystary júrgizilýde. Buqaralyq aqparat quraldarynda halyqqa tatýlasý rásimderi týraly málimetter keńinen jaryq kórýde. Sóıtip, halyq daýdy sotsyz sheshýge baǵyttalýda.
«Ekinshiden, tatýlasý ortalyqtaryn ashyp, tegin, sapaly, keshendi qyzmet kórsetý. Tatýlasý ortalyǵy tek daý sheshý ordasy bolyp qana turmaı, halyqtyń sanasyna oń áserin tıgizetin, sottasýdyń ózi uıat, tabıǵatymyzǵa jat qylyq ekenin nasıhattaıtyn, ulttyq ıdeologııamyzdy nyǵaıtatyn qoǵam ordasy bolýy tıis», - dedi S.Súleımen.
Úshinshiden ol bıler ınstıtýtyn qaıta jańǵyrtý, ony daý sheshýdegi balama ádis retinde qoldanýdy usyndy.
«Bizdiń zańdarymyzdaǵy ádilettilik , adaldyq prıntsıpteri, tatýlasý tásilderi bıler ınstıtýtynan bastaý alǵanyn árdaıym maqtanyshpen aıtamyz. Elbasymyz jarııalaǵan «Rýhanı jańǵyrý» baǵdarlamasynyń da negizgi - ulttyq sanaǵa, ulttyq bolmysqa oralý. Aıtylyp otyrǵan ózara tatýlasý, aýyl úıdiń áńgimesin sotqa deıin jetkizbeý máselesi de osy rýhanı jańǵyrýdyń bir tarmaǵy. Osy oraıda aýylda, aýdanda, qalada, oblys ortalyqtarynda halyq saılaǵan bıler bolýy kerek. Olar «bı» ataýyna, onyń qasıetti mánine saı bolyp, halyqqa qyzmet etpeı me? Sóıtip, bıler ınstıtýty balama ádis bolyp, adamdar arasyndaǵy jáne otbasylyq daýlardy shesher edi. Sizder, bizder bolyp, ákimdermen birigip, bıler ınstıtýtyn qaıta jańǵyrtsaq»,- dedi ol.
Tórtinshiden, tóraǵa keńesshisi zańnamaǵa daýlardyń keıbir sanattary boıynsha sotqa deıingi mindetti medıatsııany engizý qajettigin basa aıtty.
«Otbasylyq, eńbek salasyndaǵy, seriktester arasyndaǵy daýlardy sotsyz sheshýdiń jyldam ári tıimdi ekeni belgili. Al bizde bul ister sotta qaralǵandardyń basym kópshiligin quraıdy. Atalǵan daýlar halyqtyń áleýmettik jaǵdaıyna tikeleı áser etedi. Bizde ajyrasý ońaı sharýaǵa aınalǵan. Elimizde árbir 3-shi otbasynyń shańyraǵy shaıqalyp, árbir úshinshi neke buzylýda. Sonda, orta eseppen ár otbasynda 2 bala dep alsaq, bir jylda 100 myńnan astam bala áke nemese ana tárbıesinen aıyrylýda. Sondyqtan atalǵan daýlar boıynsha sotqa deıingi mindetti medıatsııany zańnamaǵa engizsek adamdardyń quqyqtaryn tolyq qamtamasyz etýge múmkindik ashady, qoǵamdaǵy daýkestik deńgeıin tómendetedi. Zańnamalarǵa joba daıyn, kóp uzamaı ózgeris Parlamentke beriledi»,- dedi Saǵatbek Súleımen.
