Jyl sońyndaǵy jaǵdaı boıynsha Astana qalasynda mektepterdegi oryn tapshylyǵy 14 myńǵa jýyq - Á.Bımendına
ASTANA. 30 jeltoqsan. QazAqparat /Gúlmıra Álıakparova/ - Jyl sońyndaǵy jaǵdaı boıynsha Astana qalasynda mektepterdegi oryn tapshylyǵy 14 myńǵa jýyqty qurap otyr.
Bul týraly Agenttiktiń tilshisine bergen suhbatynda qalalyq Bilim basqarmasynyń bastyǵy Ásıma Bımendına aıtty.
Á.Bımendınanyń aıtýynsha, bıyl «100 mektep» baǵdarlamasy sheńberinde 3600 oryndyq úsh mektep iske qosyldy. Olar: Ońtústik-shyǵys shaǵyn aýdanyndaǵy №63, Stepnoı garajdar kooperatıvindegi №64 jáne Tilendıev dańǵyly boıynda salynǵan №65 mektepter.
2011 jyly atalmysh baǵdarlama sheńberinde taǵy tórt orta bilim berý mekemesi esikterin aıqara ashatyn bolady. Olar: Tilendıev dańǵyly boıynda (1200 oryn), Esildiń sol jaǵalaýyndaǵy ákimshilik ortalyqta (1200 oryn), Kóktal shaǵyn aýdanynda (800 oryn) jáne Ilınka kentinde (1200 oryn) ornalaspaq.
«Kóshi-qon aǵynyn qosa alǵanda qazir mektepterdegi oryn tapshylyǵy 14 myńǵa jýyq. Búgin Astanadaǵy 66 memlekettik jáne 13 jekemenshik mektepterde barlyǵy 74 myń bala bilim alady», - dedi ol.
