Jyl sońynda ınflıatsııa joǵary bolýy múmkin – Ulttyq bank
NUR-SULTAN. QazAqparat – 2021 jyldyń sońyna qaraı ınflıatsııa nysanaly dıapazonnan 0,4-0,5 paıyzǵa joǵary bolýy múmkin. Bul týraly QR Ulttyq bankiniń tóraǵasy Erbolat Dosaev málim etti, dep habarlaıdy QazAqparat tilshisi.
«Bıylǵy jyl basyndaǵy azdaǵan turaqtanýdan keıin mamyrda ınflıatsııalyq protsesterdiń jyldyq kórsetilim boıynsha 7,2%-ke deıin jedeldeýi baıqalady. Azyq-túlikke jatpaıtyn taýarlar men aqyly qyzmetter baǵasynyń aıtarlyqtaı ósýi azyq-túliktiń quramdas bólikteriniń dezınflıatsııasymen teńestirildi. Azyq-túlik ınflıatsııasy nan-toqash ónimderiniń, ettiń, jemis-kókónis ónimderiniń baǵasy ósýiniń baıaýlaýy aıasynda 9,8%-ten 9,3%-ke deıin báseńdedi», - dedi Erbolat Dosaev Úkimet otyrysynda.
Ulttyq bank tóraǵasy dezınflıatsııalyq protsesterge qaramastan, jekelegen taýar naryqtarynda qymbattaý jalǵasyp jatqanyn atap ótti.
«Kıim-keshek pen aıaq qıim baǵasynyń 5,9%-ke deıin, benzın baǵasynyń 12,7%-ke deıin ósý qarqynyna baılanysty azyq-túlikke jatpaıtyn ınflıatsııa 6,4%-ten 6,7%-ke deıin jedeldedi. Karantındik shekteýlerdi jeńildetý jaǵdaıynda joǵarylaǵan suranys aıasynda, elektr energııasy tarıfteriniń artýy men jekelegen qyzmetter baǵasynyń ósýi aıasynda aqyly qyzmetter ınflıatsııasy 4,1%-ten 5,1%-ke deıin jedeldedi.
Benzın baǵasynyń edáýir kúrt ósýin, elektr energııasy baǵasynyń ósýin, barynsha kúshti fıskaldyq yntalandyrýdy jáne joǵary ınflıatsııalyq kútýlerdi eskersek, 2021 jyldyń sońyna qaraı, bizdiń sońǵy boljamdarǵa sáıkes, ınflıatsııa nysanaly dıapazonnan 0,4-0,5 paıyzdyq tarmaqqa joǵary qalyptasýy múmkin. Sonymen birge, 2022 jyly biz ishki proınflıatsııalyq faktorlar áseriniń taýsylýyn jáne syrtqy ınflıatsııalyq qysymnyń álsireýin kútemiz. Nátıjesinde ınflıatsııa bekitilgen dáliz 4-6%-ke kiredi», - deıdi E. Dosaev.
Atalǵandy eskerip, bıylǵy 7 maýsymda Ulttyq bank bazalyq stavkany 9% deńgeıinde saqtaýǵa sheshim qabyldaǵan.
«Proınflıatsııalyq faktorlar tarapynan táýekelder iske asqan jaǵdaıda jáne boljamdy baǵalaýlarmen salystyrǵanda barynsha baıaý dezınflıatsııa jaǵdaıynda Ulttyq bank aqsha-kredıt sharttaryn qatańdatý boıynsha sheshim qabyldaıdy», - deıdi Erbolat Dosaev.
