Jyl sońynda Astana avtobýstarynda jol aqysyn elektrondy tóleý júıesi engiziledi
ASTANA. QazAqparat - 2015 jyldyń 4-shi toqsanynda Astana qalasynyń qoǵamdyq kóliginde jol aqysyn elektrondy tóleý júıesin engizý josparlanýda.
Bul týraly «QazAqparat» agenttiginiń resmı saýalyna bergen jaýabynda Astana qalasy ákimdiginiń baspasóz qyzmeti málim etti.
Júıe qalalyq, qala janyndaǵy jáne jedel baǵdarlarda júzege asyrylady. Avtobýstaǵy elektrondy bılettiń quny, sondaı-aq jol júrý tarıftik saıasat sheńberinde anyqtalatyn bolady. Bul rette, qaǵazdaǵy biryńǵaı jol bıletine uqsas jeńildikter júıesi de saqtalady.
Ákimdiktiń habarlaýynsha, jol aqysyn elektrondy tóleý júıesine ótý kezeń-kezeńmen júzege asyrylmaq. Ol tolyǵymen engizilgen kezde avtobýstarda kondýktorlar qyzmeti joıylady.
«Jol aqysyn elektrondy tóleý júıesin engizý maqsaty - halyqqa kórsetiletin qyzmettiń sapasyn jaqsartý, jolaýshylardy esepke alý jáne korrespondentsııalaý, sondaı-aq jol aqysyn saralaý bolyp tabylady. Bul qarjylyq aǵyn men salyq tólemderiniń aıqyndylyǵyn joǵarlatady, jolaýshylardy mingizip-túsirý ýaqytyn, kóliktiń qozǵalys qashyqtyǵyn aıtarlyqtaı azaıtyp, qozǵalys qaýipsizdigin jaqsartady», - delingen habarlamada.
