Jyl sońynda álemdegi jumyssyzdar sany 190 mıllıonnan asady – BUU

NUR-SULTAN. QazAqparat – Qazirgi kúni álem boıynsha jumyssyzdar sany 188 mıllıon adamdy quraıdy. 2020 jyldyń sońyna qaraı olardyń qatary taǵy 2,5 mıllıon adamǵa tolyǵýy múmkin. Bul týraly BUU resmı saıty Halyqaralyq eńbek uıymynyń jańa baıandamasyna silteme jasap habarlady.

Oǵan sebep – eńbekke qabiletti adamdar sanynyń ósýi jańa jumys oryndarynyń qurylý qarqynyn basyp ozýda. Bul rette, álemde jumysshy kedeılerdiń sany artyp keledi.

Baıandamaǵa sáıkes, jarty mıllıardqa jýyq adam ózderi qalaǵannan az eńbek etedi jáne ol úshin tıyn-teben alady nemese múldem jumys istemeıdi.

«Mıllıondaǵan qarapaıym adamǵa eńbek arqyly ómirin jaqsartý qıyn bolyp barady», - dedi Halyqaralyq eńbek uıymynyń bas dırektory Gaı Raıder.

Álemde 188 mıllıon adam jumyssyz bolǵanynan bólek, taǵy 165 mıllıony tómengi jalaqy alady. Buǵan qosa, jumyssyz retinde resmı tirkelmegen 120 mıllıon adam eki qolǵa bir kúrek tappaı otyr. Osylaısha, jumyspen qamtý salasyndaǵy daǵdarys jalpy 470 mıllıon adamdy qamtıdy.

«Qazirgi ýaqytta 630 mln jumysshy (eńbek etetin árbir besinshi adam) kedeıshilikte ómir súrip, kúnine 3,2 dollardan az aqsha alady. Jumyssyzdyqtan kóbine jastar zardap shegetinine qarap, teńsizdik beleń alǵanyn baıqaýǵa bolady. Qazirgi kúni álemde 15-24 jas aralyǵyndaǵy 267 mln jastyń jumysy joq», - delingen málimette.