Jyl sońyna qaraı Qazaqstannyń úsh qalasynda 5G jelisi iske qosylady

NUR-SULTAN. QazAqparat – QR Tsıfrlyq damý, ınnovatsııalar jáne aeroǵarysh ónerkásibi mınıstrligi 5G jelisin iske qosý jaıyndaǵy josparlarymen bólisti, dep habarlaıdy QazAqparat tilshisi.

«Mınıstrlik Qazaqstan Respýblıkasy aýmaqtyq prıntsıp negizinde radıojıilik spektr (budan ári – RJS) taratý bóliginde 5G jelisin engizý strategııasyn ázirledi. Úzdiksiz 100 MGts jolaǵyn bólý múmkindigi bar 3,6 – 3,9 GGts dıapazonyndaǵy jıilikter belgilendi. Sondaı-aq, Qazaqstanda 5G tehnologııasyn engizý jáne iske asyrý merzimderi belgilengen», - dep jaýap berdi vedomstvo redaktsııa saýalyna.

Usynylǵan málimetke sáıkes, búginde baılanys operatorlary kelesi jumystardy atqardy:

«Qazaqtelekom» AQ Nur-Sultan qalasynda «Astana Hub» IT startaptar halyqaralyq tehnoparki» aýmaǵynda pılottyq 5G jelisin iske qosty.

Shymkent qalasynda bazalyq stantsııany ornatý orny anyqtaldy («Shymkent Plaza» SO), 5G tehnologııasynyń synaqtary tehnıkalyq engizý satysynda.

«Mobaıl Telekom-Servıs» JShS pılottyq 5G jelisin Almaty qalasyndaǵy úsh jerde iske qosqan. Olar – «Qaısar Plaza» saýda-keńse ortalyǵy (Jeltoqsan k-ci, 115), Panfılov kóshesi (Abaı atyndaǵy MAOBT-tan Tóle bı kóshesine deıin) jáne «Medeý» bıik taýly sport kesheni.

«Ksell» AQ Almaty qalasynyń Arbat aýdanynda (Nursultan Nazarbaev pen Jibek joly dańǵyldarynyń qıylysy) 5G tehnologııasyn testileýdi iske qosty.

«Kar-Tel» JShS Almaty qalasynda NARXOZ University (Jandosov k-si, 55) jáne «Grand Alataý» bıznes ortalyǵy (Tımırıazev k-si, 28V) aýdandarynda 5G tehnologııasyn testilik rejımnen ótkize bastaǵan.

«Qazaqstanda 5G jelisin 2022 jyldyń sońyna qaraı respýblıkalyq mańyzy bar qalalar – Nur-Sultan, Almaty, Shymkentte, al 2023-2025 jyldary oblys ortalyqtarynda iske qosý josparlanyp otyr», - dep tolyqtyrdy vedomstvodan.