Jyl sońyna qaraı HQKO-lar qazirgi 59 qyzmettiń ornyna 150-den astam qyzmet túrin kórsetedi
ASTANA. 19 tamyz. QazAqparat - Jyl sońyna deıin halyqqa qyzmet kórsetý ortalyqtary memlekettik qyzmettiń 150-den astam túrin kórsetetin bolady dep josparlanýda.
Qazirdiń ózinde respýblıka óńirlerinde jyljymaly utqyr HQK Ortalyqtary jumys isteıdi jáne avtokólik quraldary men júrgizýshi kýálikterin tirkeıtin jańa ortalyqtar ashylýda. Bul týraly Pm.kz saıtyna QR Kólik jáne kommýnıkatsııa mınıstrliginiń baspasóz qyzmeti habarlaıdy.
Bıyl Qazaqstannyń 4 oblysynda avtokólik quraldary men júrgizýshi kýálikterin tirkeý salasyndaǵy mamandandyrylǵan halyqqa qyzmet kórsetý ortalyqtary ashylatyn bolady.
Kólik jáne kommýnıkatsııa mınıstrliginiń aqparyna qaraǵanda, Astana, Almaty, Aqtaý jáne Qaraǵandy qalalarynda ortalyqtar qurý úshin aqparattyq júıeni tehnıkalyq daıyndaý jumystary júrgizilýde. 2013 jyly osyndaı uıymdardy basqa óńirlerde de qurý josparlanýda. Atap ótý kerek, jańa ortalyqtarda qyzmetkerlerdiń praktıkalyq emtıhan tapsyrý nátıjesine áserin boldyrmaıtyn «avtomattandyrylǵan avtodorm» júıesi qoldanylmaqshy.
Sonymen qatar, respýblıkanyń 16 oblysynyń árqaısysynda shalǵaı aýyldarǵa shyǵyp, ondaǵy turǵyndarǵa qyzmet kórsetetin bir-bir utqyr HQKO iske qosylǵan.
2012 jyldyń sońyna deıin taǵy da 56 jyljymaly utqyr HQKO iske qosylady. Kólik jáne kommýnıkatsııa mınıstrligi habarlaǵandaı, І jartyjyldyqta HQKO 3 699 ret saparǵa shyǵyp, 81 444 memlekettik qyzmet kórsetken.
Halyqqa qyzmet kórsetetin 28 ortalyqqa memlekettik qyzmet kórsetetin jańa bıznes-úrdister engizilgen. Sonymen qatar, azamattardy ortalyq memlekettik organdar basshylarynyń on-line qabyldaýy iske qosylǵan, jurtshylyqpen keri baılanysty qamtamasyz etetin jáne HQKO jumysyna on-line rejiminde beınemonıtorıng júrgizetin Sıtýatsıalyq ortalyq qurylǵan. Budan basqa, ótken jarty jylda kórsetiletin memlekettik qyzmettiń sapasyn arttyrý maqsatynda HQKO-nyń 3 102 qyzmetkerin attestatsııalaý júrgizilgen.
Qazirgi kezde HQKO arqyly 7 memlekettik organnyń 59 qyzmet túri kórsetiledi. Qazirde memlekettik organdar memlekettik qyzmetter tizilimine túzetýler engizýde, bul 2012 jyldyń sońyna qaraı 20 memlekettik organnyń 156 qyzmet túrin kórsetýge múmkindik beretin bolady.
Ortalyqtar jumysynyń jańa formatqa kóshýi qujattar alý protsedýrasyn ońtaılandyrýdy, jurtshylyqqa kórsetiletin memlekettik qyzmet sapasyn arttyrýdy, sondaı-aq olardyń monıtorıngisi men sapasyn baǵalaýǵa arnalǵan quraldardy jasaýǵa múmkindik beredi.
