Jyl sońyna qaraı ekonomıkanyń damýy baıaýlaıdy - Forex club kompanııasy tobynyń Ýkraınadaǵy aqparattyq-taldaý ortalyǵynyń jetekshisi
ALMATY. Qyrkúıektiń 8-i. QazAqparat /Erlik Erjanuly/ - Álemdik ekonomıkanyń damýyna boljam jasaıtyn bolsaq, jyl sońynda ósim birshama baıaýlaıdy. Ony Forex club kompanııasy tobynyń taldaýshylary búgin Almatyda ótkizgen baspasóz máslıhatynda aıtty,
dep habarlaıdy QazAqparat.
"Alǵashqy jartyjyldyqta ekonomıkanyń ósý qarqyny Ýkraınada 6 paıyz, Qazaqstanda 8 paıyzdy qurady. Básekege qabilettik jaǵynan Qazaqstan alda kele jatyr. Ósim qarqyny jaǵynan da, ekonomıkany uıymdastyrý jaǵynan da", deıdi Forex club kompanııasy tobynyń Ýkraınadaǵy aqparattyq taldaý tobynyń jetekshisi Nıkolaı Ivchenko. Onyń aıtýynsha, ekonomıkanyń ósýine negizgi salalardyń baıaýlaýy áser etedi. Máselen, suranystyń kemýinen Ýkraınada metallýrgııa 14,8-den 11,5 paıyzǵa, hımııa jáne munaı hımııasy 20,8-den 15,4 paıyzǵa, mashına jasaý 31,3-ten 25 paıyzǵa, júk tasymaly 12,5-ten 9 paıyzǵa deıin tómendeýi múmkin. Al Qazaqstanda ónerkásiptiń óndirýshi jáne óńdeýshi salalarynda, aýyl sharýashylyǵy men qurylys salasynda óndiris qarqyny baıaýlaýy josparlanýda. Sonyń áserinen Qazaqstannyń jalpy ishki ekonomıkasy 8-den 5 paıyzǵa kemýi múmkin. Buǵan eksporttyń shıkizattyq baǵytta bolýy túrtki bolady.
