Jyl sońyna deıin Jambyl oblysynda 2 564 páterdiń qurylysy aıaqtalady

ASTANA. QazAqparat – Jyl basynan beri Jambyl oblysynda 155,1 myń sharshy metr turǵyn úı paıdalanýǵa berildi, dep habaraıdy QazAqparat tilshisi.

«Aýdan ortalyqtary men Taraz qalasynda jańa massıvter men móltek aýdandar boı kóterýde. Jalpy, jyl basynan beri 155,1 myń sharshy metr turǵyn úı paıdalanýǵa berilse, jyl sońyna deıin 698,7 myń sharshy metr turǵyn úıdi tapsyrýda josparlap otyrmyz. Búginde quny 13,2 mlrd teńgeni quraıtyn 3 929 páterli 74 turǵyn úıdiń qurylysy júrip jatyr. Onyń 2 564 páterli 45 úıi bıyl tapsyrylady», - dep málim etti Jambyl oblysynyń ákimi Nurjan Nurjigitov OKQ-de ótken brıfıngide.

Sonymen birge, spıker óńir jastarynyń baspana máselesin sheshýge baǵyttalǵan «Áýlıe ata jastary» baǵadarlamasynyń oryndalý barysyna toqtaldy.

«Baǵdarlama aıasynda byltyr 40 jas otbasy 500 mln teńgege baspanaly bolsa, bıyl 2 mlrd teńgege 140 jasqa páter kiltin berýdi kózdep otyrmyz. Biz turǵyn úı máselesin tek bıýdjet qarajaty esebinen ǵana emes, ata-babamyzdan jalǵasyp kele jatqan dástúrli «Asar» tásiline de den qoıdyq. Máselen, joba bastalǵaly asarlatqan aǵaıynnyń kómegimen 338 muqtaj jerlesimiz baspanaly bolsa, bıyl 105 otbasyna qýanysh syılasaq degen nıetimiz bar», - dedi Nurjan Nurjigitov.

Ákiminiń sózinshe, jyl sońyna deıin áleýmettik osal toptaǵy otbasylarǵa jalpy somasy 7,6 mlrd teńgege 797 páter satyp alyp berý josparlanyp otyr.