Jyl sońyna deıin uıaly baılanystyń 4G LTE standarty Almaty men Astana qalalarynda iske qosylady - A.Jumaǵalıev
ASTANA. 19 jeltoqsan. QazAqparat - Bul týraly búgin QR Prezıdenti janyndaǵy Ortalyq kommýnıkatsııalar qyzmeti uıymdastyrǵan brıfıngte QR Kólik jáne kommýnıkatsııa mınıstri Asqar Jumaǵalıev málim etti.
«Búginde telekommýnıkatsııa barynsha qarqyndy damýda. Uıaly baılanystyń úshinshi býyny 3G jelisimen 2015 jyldyń basyna qaraı turǵyndar sany 10 myń adamnan asatyn eldi mekender men barlyq aýdan ortalyqtarynyń atalǵan tehnologııamen qamtamasyz etilýi josparlanýda», - dedi mınıstr.
Sonymen qatar onyń aıtýynsha, aǵymdaǵy jyldyń sońyna deıin uıaly baılanystyń 4G LTE standarty engiziletin bolady.
«Biz ony Almaty men Astana qalalarynda iske qosamyz dep úmittenemiz. Al odan keıin birtindep Qazaqstan qalalarynda damytamyz. Jobany ilki rejimde «Qazaqtelekom» AQ júzege asyrýdy bastady. Uıaly baılanystyń tórtinshi býyny LTE standartynyń ilki jobasyn uıymdastyrý jáne testileý úshin Astana jáne Almaty qalalarynyń aýmaǵynda bazalyq stansalary ornatylǵan», - dedi ol.
Aıta keteıik, QR Statıstıka agenttiginiń shuǵyl aqparatyna sáıkes, 2012 jyly baılanys salasynda uıaly baılanys abonentteriniń jáne Internet jelisin paıdalanýshylar sany boıynsha ósý dınamıkasy baıqalady. Uıaly baılanys abonentteriniń sany 29,9 mln. adamdy qurady, Internet jelisin paıdalanýshylar sany 2012 jyldyń 3 toqsanynda 9,7 mln. adamǵa ósti.
