Jyl sońyna deıin úsh baǵyt boıynsha júrdek poıyzdar jolǵa shyǵady - «Jolaýshylar tasymaly» AQ

ASTANA. QazAqparat - «Jolaýshylar tasymaly» AQ 8 aıdyń ishinde 13,6 mln. jolaýshy tasyǵan, olardyń ishinde tek jazǵy úsh aıda (maýsym-tamyz) 5,9 mln. jolaýshy (43 paıyz) tasymaldaý qyzmetin tutynǵan. Bul ótken jyldyń jazǵy kezeńimen salystyrǵanda, 27 myń jolashýyǵa kóp, delingen kompanııanyń habarlamasynda.

Statıstıkalyq derekter boıynsha, júrdek poıyz qyzmetine degen suranys artqan, jaz aılarynda júrdek poıyzdarmen 298 myń jolaýshy tasymaldanǵan, bul ótken jylǵydan 76 myń adamǵa kóp.

«Jaz mezgilinde halyqty baratyn jerine deıin tasymaldap, jetkizýdi qamtamasyz etý úshin 122 baǵyt boıynsha poıyz qatynasy uıymdastyryldy. Úsh shalǵaı aımaqtarǵa, atap aıtqanda, Astana-Saryaǵash, Astana- Lenınogorsk jáne Aqtóbe-Oral baǵyttary boıynsha poıyzdar kúndelikti júretin boldy. Eki jaqyn qalalar marshrýty boıynsha qozǵalys merzimdiligi ulǵaıtyldy, kúnine eki ret júretin Astana-Qaraǵandy poıyzy kúnine úsh retke aýystyryldy, Astana-Býrabaı kýrorty boıynsha baǵyt 1 retten kúnine 2 ret júretin bolyp ózgertildi», delingen habarlamada.

Aǵymdaǵy jyldyń sońyna deıin «Jolaýshylar tasymaly» AQ Astana-Qyzylorda, Astana-Óskemen jáne Almaty-Óskemen baǵyttary boıynsha úsh júrdek poıyzdy iske qosýdy josparlaýda. Halyqaralyq qatynastaǵy poıyzdarǵa bılet satyp alýǵa ýaqytyna qaraı 10-nan 30 paıyzǵa deıin jeńildikter engizilgen (15 táýlikten 45 táýlikke deıin). Al júrdek poıyzdarǵa vagon túrine qaraı («Grand», «Bıznes») 10 paıyzdan 25 paıyzǵa deıin jeńildikter qarastyrylǵan.