Jyl sońyna deıin Úkimet Májiliske birqatar zań jobalaryn usynady - Májilis Tóraǵasy
ASTANA. Qyrkúıektiń 2-si. QazAqparat /Qanat Mámetqazyuly/ - Strategııalyq josparǵa sáıkes, jyl sońyna deıin Úkimet Májiliske birqatar zań jobalaryn usynady. Búgin QR Parlamenti Májilisiniń jalpy otyrysynda jıyndy ashyp sóz sóılegen palata Tóraǵasy Oral Muhamedjanov osylaı málim etti.
Sóz arasynda spıker Memleket basshysynyń 2020 jylǵa deıingi Strategııalyq damý josparyn quqyqtyq qamtýdy basty mindet retinde belgilegenin aıtyp, bul rette otandyq ekonomıkanyń ınnovatsııalyq jolǵa túsýine qajetti normatıvtik quqyqtyq bazany qalyptastyrýdy jalǵastyrý qajettigin atap ótti.
«Osy turǵydan, biz bıylǵy jyldyń sońyna deıin Úkimet Májiliske «Indýstrııalyq saıasat týraly», «Arnaıy ekonomıkalyq aımaqtar týraly», «Investıtsııalar týraly» Qazaqstan Respýblıkasynyń Zańyna ózgerister men tolyqtyrýlar engizý týraly» jáne taǵy da basqa zań jobalaryn usynady dep kútip otyrmyz», dedi Tóraǵa. Sonymen birge, O. Muhamedjanov aǵymdaǵy sessııada «Ǵylym týraly» zańnyń jańa redaktsııasymen jumys aıaqtalýy tıis ekendigin aıtyp, atalǵan qujat normalary tıimdi ǵylymı ınnovatsııalyq júıe qurýǵa baǵyttalatynyn jetkizdi.
«Sonymen qatar, bizdiń aldymyzda memlekettiń quqyq qorǵaý salasy men sot júıesin odan ári jetildirýdi zańnamalyq jaǵynan qamtamasyz etý boıynsha aýqymdy jumys kólemi kútip tur. Parlament memlekettiń álýettik apparatyn jańǵyrtýǵa, qylmystyq zańnamany yryqtandyrýǵa jáne qylmystardy qylmystyq sıpattan aryltýǵa baǵyttalǵan zańdardy qarastyryp, qabyldaýy qajet. Bular elimizdiń quqyq qorǵaý qyzmeti men sot júıesiniń tıimdiligin arttyrýǵa yqpal etetin bolady. Prezıdenttiń tapsyrmasy boıynsha biz osy sessııada Qazaqstannyń zııatkerlik menshikti qorǵaý týraly zańnamasyn halyqaralyq standarttarǵa sáıkes keltirip, notarıat týraly zańnamany jańartýymyz kerek», dedi Tóraǵa.
