Jyl sońyna deıin Sırııadan bas saýǵalaǵan bosqyndar sany 6,5 mıllıonǵa jetýi múmkin - BUU
ASTANA. QazAqparat - Sırııadaǵy azamattyq soǵystan bas saýǵalap, údere kóshken bosqyndar sany jyl sońyna qaraı 3,5 mıllıonnan 6,5 mıllıonǵa deıin jetýi múmkin. Interfaks agenttiginiń habarlaýynsha, BUU Bosqyndar isi jónindegi Bas komıssarynyń ókili Amın Avad osylaı málimdegen.
BUU komıssarynyń aıtýynsha, qazirgi tańda 2,5 mıllıonǵa jýyq sırııalyq azamat kórshiles elderdi panalap otyr. Uıym taratqan aqparatqa sáıkes, Lıvanda 900 myńǵa jýyq, Túrkııada 600 myńǵa jýyq, Iordanııada 590 myń, Iraktyń soltústiginde 200 myńnan astam bosqyn turyp jatyr. Sonymen qatar, 135 myńǵa jýyq sırııalyq Mysyrdan, 20 myńy Soltústik Afrıkadan pana tapsa, 30 myń azamat ózge memleketterge shashyrap ketken.
BUU Bas komıssarynyń Sırııa jónindegi aımaqtyq úılestirýshisi qyzmetin atqaratyn A.Avad bıyl sırııalyq bosqyndarǵa kómek retinde 6,5 mlrd dollar jınaý qarastyrylyp otyrǵanyn aıtady. Onyń sózine qaraǵanda, bul qarajat bosqyndardy baspanamen qamtamasyz etýge, oqytýǵa jáne qorǵaýǵa jumsalmaq. «Sonymen qatar, týǵan jerin tastap shyǵa qoımaǵan 3 mılıonǵa jýyq adam kómekke zárý», dep qorytty A.Avad.
