Jyl sońyna deıin respýblıkalyq joldardyń 91 paıyzy talapqa saı bolady – komıtet

ASTANA. QazAqparat – Elimizde qoldanystaǵy 11 myń shaqyrymnan astam avtojol qaıta salynyp jatyr. Onyń 7 myń shaqyrymy - respýblıkalyq mańyzy bar jol. Bul týraly avtomobıl joldary komıtetiniń tóraǵasy Tólegen Abdýllın málim etti, dep habarlaıdy QazAqparat tilshisi.

«11 myń shaqyrymnan astam avtojoldyń ishinde respýblıkalyq mańyzy bar 7 myń shaqyrym jáne jergilikti mańyzǵa ıe 4,6 myń shaqyrym jol bar. Sonymen qatar 4 myń shaqyrym respýblıkalyq mańyzy bar jol qaıta jóndelip jatyr. Onyń 1,2 myń shaqyrymyn jýyrda aıaqtaımyz. Kúrdeli jáne ortasha jóndeýmen shamamen 3 myń shaqyrym jol qamtyldy, sonyń 900 shaqyrymyn jóndeý aıaqtalady. Jergilikti mańyzǵa ıe avtojoldarǵa kelsek, 4,6 myń shaqyrym jol qaıta jóndeýden ótip jatyr», - dedi Tólegen Abdýllın ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, jyl qorytyndysy boıynsha respýblıkalyq joldardyń 91%, al jergilikti kólik joldarynyń 85% normaǵa saı bolady.

«Joldardy rekonstrýktsııalaý boıynsha 17 joba iske asyp jatyr. Atap aıtsaq, Memleket basshysynyń tapsyrmasy boıynsha bıyl 72 shaqyrym bolatyn «Podstepnoe – Fedorovka» avtojolynyń eki ýchaskesin rekonstrýktsııalaýdy bastadyq. Oǵan 6 mlrd teńge bólindi. Qalǵan 2 ýchaskege qarajat tartý jaǵy pysyqtalyp jatyr», - deıdi ol.

Buǵan deıin habarlaǵanymyzdaı, 1 qarashada aqyly avtojoldardan qazynaǵa 25 mlrd teńge paıda tústi.