Jyl sońyna deıin respýblıkalyq joldardyń 91% qalypty jaǵdaıda bolmaq

NUR-SULTAN. QazAqparat – Indýstrııa jáne ınfraqurylymdyq damý mınıstri Qaıyrbek Óskenbaev Úkimet otyrysynda halyqty sýmen qamtý, jol salý, baspana berý kórsetkishteri týraly aıtyp berdi, dep habarlaıdy QazAqparat tilshisi.

«Bıyl 1 tamyzdaǵy jaǵdaı boıynsha «Qýatty óńirler – el damýynyń draıveri» ulttyq jobasyn iske asyrýǵa 650,1 mlrd teńge bólindi, onyń ishinde respýblıkalyq bıýdjet 440,4 mlrd teńgeni, bıýdjetten tys qarajat 155,8 mlrd tengeni jáne jergilikti bıýdjet 53,9 mlrd tengeni quraıdy. Jospar kestesine sáıkes barlyq bıýdjet tolyq kólemde ıgerildi», - dedi Q. Óskenbaev.

Mınıstrdiń aıtýynsha, ınfraqurylymdy keshendi damytý» mindeti boıynsha 79,3 mlrd teńge tolyq ıgerildi nemese 99%-dy paıyzdy qurady.

«Іshki kólik jelisin damytý» mindetinde 301,2 mlrd tenge ıgerilgen. Olar respýblıkalyq mańyzy bar avtomobıl joldaryn salýǵa, rekonstrýktsııalaýǵa jáne jóndeýge, jergilikti mańyzy bar avtomobıl joldaryn salýǵa, rekonstrýktsııalaýǵa jáne jóndeýge baǵyttalǵan.

«Qalypty jaǵdaıdaǵy jol sapasynyń kórsetkishi jyl sońyna deıin respýblıkalyq jeli boıynsha 91%-ǵa deıin, al jergilikti jeli boıynsha 85%-ǵa deıin jetedi. Shymkent jáne Qostanaı qalalaryndaǵy áýejaılardyń jerústi ınfraqurylymy jańǵyrtylady. Sondaı-aq bıyl Almaty qalasynyń áýejaıynda jańa jolaýshylar termınalynyń qurylysy bastaldy», - dep túsindirdi Q. Óskenbaev.