Jyl sońyna deıin OQO-da 6 myń páter paıdalanýǵa berilmek

ShYMKENT. QazAqparat - Ońtústik Qazaqstan oblysynda jyl sońyna deıin 116 kópqabatty úı ıaǵnı 6 myń páter paıdalanýǵa beriledi. Al, jalpy óńirde 263 turǵyn úıdiń qurylysy júrgizilýde. Búgin bul týraly Óńirlik kommýnıkatsııalar qyzmetinde ótken brıfıngte oblystyq Qurylys basqarmasynyń basshysy Quttybek Jamashev málim etti.

Basqarma basshysynyń aıtýynsha, memlekettik bıýdjetten 108 úıdiń qurylysy júrip jatsa, onyń 61-i jyl sońyna deıin tapsyrylady. Ulttyq kompanııalar esebinen 45 úıdiń 43-iniń qurylysy bitýge jaqyn. Al, «Shymkent» ÁKK» AQ salyp jatqan segiz úıdiń altaýy taıaý arada paıdalanýǵa berilmek.

Jeke kásipkerler esebinen salynyp jatqan 102 úıdiń altaýynyń qurylysy jyl sońyna deıin tolyq bitedi dep josparlanýda. Al, qalǵan 147 úıdiń qurylysy 2018 jyly jalǵasady.

«2017 jyldyń 8 aıynyń qorytyndysy boıynsha 400,2 myń sharshy metr turǵyn úı ıaǵnı 3 783 páter paıdalanýǵa berildi. Turǵyn úı qurylysy ótken jyldyń osy merzimimen salystyrǵanda 124 paıyzǵa ulǵaıyp otyr. Paıdalanýǵa berilgen turǵyn úıdiń naqty kóleminiń ındeksi 115,7 mlrd teńgeni qurap, ótken jylmen salystyrǵanda 105 paıyzǵa oryndaldy», - dedi Quttybek Jamashev.

Budan bólek, «Nurly jol» memlekettik baǵdarlamasy aıasynda oblysymyzda 32 mekteptiń qurylysy júrgizilýde. 2016 jyldan ótpeli 19 mektepti aǵymdaǵy jyly paıdalanýǵa berý josparlansa, búgingi kúnge 16 mektep paıdalanýǵa berilgen. Jyl sońyna deıin 3 mektepti paıdalanýǵa berý josparlanyp otyr. Qalǵan 13 mektep 2018 jyly el ıgiligine berilmek.

Respýblıkalyq bıýdjetten 4 mektep pen 1 mektep-ınternattyń qurylysy júrip jatyr. Atalǵan nysandardaǵy qurylys jumystary 2018 jyly aıaqtalady. Al, oblystyq bıýdjetten 39 mektep pen 3 kolledjdiń qurylysy júrgizilýde. Búgingi kúnge 8 mektep paıdalanýǵa berilgen.

Sondaı-aq, densaýlyq saqtaý salasyna qatysty 38 nysanda qurylys jumystary jalǵasýda. Sonyń 5 nysany paıdalanýǵa berilse, 29 nysan jyl sońyna deıin tapsyrylady. 4 emhana qurylysy 2018 jylǵa ótpeli bolyp otyr. Qalǵan 11 ózge de áleýmettik nysandardyń qurylysy 2018 jyly aıaqtalady.

Bıyl memlekettik bıýdjet esebinen 21 ınfraqurylymdyq nysannyń qurylysy júrgizilýde. Jyl sońyna deıin 8 nysan paıdalanýǵa tapsyrý josparlansa, 13 nysannyń qurylysy 2018 jylǵa ótpeli. Aǵymdaǵy jyldyń 1 qyrkúıegine 6 nysan paıdalanýǵa tapsyrylyp, 1 485 jeke jer ýchaskeleri ınfraqurylymmen qamtamasyz etilgen.

Aıta keteıik, 2017 jyly basqarma tarapynan 47 nysannyń jobalaý-smetalyq qujaty ázirlenýde. Jalpy 47 jobanyń 26-sy jańa, 21-i 2016 jyldan beri júrgizilýde. 2017 jylǵa oblystyq bıýdjet qarajaty esebinen bólingen qarjyǵa sáıkes, 20 jobany aıaqtaý josparlanyp otyr.