Jyl sońyna deıin múgedektikke járdemaqy taǵaıyndaý boıynsha birqatar qyzmetter avtomattandyrylady - S. Jaqypova

ASTANA. QazAqparat - Aǵymdaǵy jyldyń sońyna deıin múgedektikke qatysty járdemaqy taǵaıyndaý boıynsha birqatar qyzmetterdi avtomattandyrý kózdeledi. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken baspasóz máslıhatynda Densaýlyq saqtaý jáne áleýmettik damý vıtse-mınıstri Svetlana Jaqypova málim etti.

Baspasóz máslıhaty memlekettik qyzmetter men fýnktsııalardy avtomattandyrý esebinen halyqqa qyzmet kórsetý sapasyn jaqsartýǵa baǵyttalǵan bolatyn.

«Bıylǵy jyldyń sońyna deıin múgedektikti jáne múgedektikke baılanysty járdemaqyny taǵaıyndaý boıynsha birqatar qyzmetterdi avtomattandyrý jáne iske qosý kózdeledi. Sonymen qatar, múmkindigi shekteýli jandardy tehnıkalyq quraldarmen qamtamasyz etý boıynsha jergilikti atqarýshy organdar tarapynan júzege asyrylatyn qyzmetterdi de avtomattandyrý qarastyrylyp otyr. Bul rette kiris núktesi bizdiń mınıstrliktiń aýmaqtyq bólimsheleri bolyp tabylady. Múgedektik taǵaıyndalǵan sátte ol tulǵalar tarapynan áleýmettik jámdemaqy taǵaıyndaý jáne tehnıkalyq quraldar alý týraly ótinishter jazylady. Osy úsh qyzmet tikeleı bir mekemede kórsetiledi», - dep atap ótti S. Jaqypova.

Sonymen qatar, vıtse-mınıstr sóz arasynda portal arqyly júzege asatyn jasyna baılanysty memlekettik járdemaqy taǵaıyndaý, memlekettik bazalyq zeınetaqy taǵaıyndaý, jumysyn joǵaltqanyna baılanysty tólemder men bala týýyna baılanysty áleýmettik járdemaqylar boıynsha qyzmetterine de toqtalyp ótti. Onyń aıtýynsha, mundaı qyzmetterdiń ońtaıly tusy sol - azamattar mekemelerge baryp, tizim boıynsha qujattar tapsyryp, taban tozdyrmaıdy. Bul úshin azamat «Elektrondyq úkimet» portalynda avtorızatsııadan ótip, onyń elektrondyq tsıfrly qoltańbasy bolýy kerek. Eger portalda onyń jeke kabıneti bolsa, ol ótinishke qol qoıyp, memlekettik ortalyqqa ótinishin onlaın rejımmen joldaıdy.