Jyl sońyna deıin Kókshetaýda 18 kópqabatty turǵyn úı paıdalanýǵa beriledi
KÓKShETAÝ. QazAqparat-Aqmola oblysynyń əkimi Məlik Myrzalın Kókshetaý qalasyndaǵy birqatar óndiristik nysandardy aralap kórdi, dep habarlaıdy QazAqparat tilshisi əkimdiktiń baspasóz qyzmetine silteme jasap.
Aımaq basshysy qalalyq saıabaqta «Rýhanı jańǵyrý» baǵdarlamasy sheńberinde demeýshiler salǵan ashyq aspan astyndaǵy «Open air» kesheninde boldy. Atalmysh dala jattyǵýy keshenin «Kókshetaý sút zaýyty» JShS salyp bergen.
«Bizdiń bul alańdy salýdaǵy basty maqsatymyz, jastardyń esirtkisiz, salaýatty ómir saltyn ustanýyna jaǵdaı jasaý. Bul sport snarıadtaryna jastar arasynda suranys joǵary. Sondyqtan, aldaǵy ýaqytta Vasılkovskıı shaǵyn aýdany men №4 orta mekteptiń aýlasyna ornatý josparda bar. Bul mektepte zaýyt dırektory Asen Jaqsylyqov bilim aldy», deıdi «Kókshetaý sút zaýyty» JShS qarjylyq dırektory Aslan Qurmanǵalıev.
Sonymen qatar, «Tehnodom» qazaqstandyq saýda jelisi men «Qazaqstannyń halyq banki» AQ fılıalynyń demeýshiligimen ortalyq saıabaqqa sport jəne balalar alańy salynǵan.
Məlik Myrzalın «Saryarqa» shaǵyn aýdanynda jańadan salynyp jatqan turǵyn úı qurylysymen tanysty. Qala basshysy Ermek Marjyqpaevtyń aıtýynsha, qazirgi kezde «Qazaqstannyń turǵyn úı qurylys jınaq bankiniń» salymshylary úshin tórt toǵyz qabatty jəne jaldamaly alty bes qabatty turǵyn úıdiń qurylysy júrip jatyr. Oǵan qosa, əleýmettik jaǵynan az qamtylǵan otbasylarǵa arnalǵan 10 kópqabatty turǵyn úıdiń qurylysy bastaldy.
«Jalpy, aǵymdaǵy jyly Kókshetaýda 132 myń sharshy metr turǵyn úı paıdalanýǵa berildi. Jyl sońyna deıin barlyǵy 180 myń sharshy metr baspana paıdalanýǵa berilmek. Qazirgi kezde qalada kópqabatty 34 turǵyn úıdiń qurylysy júrip jatyr. Onyń 18-in aǵymdaǵy jyldyń sońyna deıin tapsyrý kózdelgen», - dedi qala ákimi.
Sonymen qatar, aımaq basshysy «Kókshetaý jylý» kommýnaldyq kəsiporynda bolyp, jylý berý maýsymyna daıyndyq jumystarynyń barysymen tanysty. Qala basshylyǵyna jylý berý maýsymyn erte bastaýdy tapsyrdy.
