Jyl sońyna deıin QHA týraly zańǵa engiziletin ózgerister Parlament qaraýyna shyǵarylady

ASTANA. QazAqparat - "Qazaqstan halqy Assambleıasy týraly zańǵa ózgerister men tolyqtyrýlar engizý týraly" jańa zań jobasy Mádenıet jáne sport mınıstrligi tarapynan ázirlenip, jyl sońyna deıin Parlament qaraýyna engizilýi tıis.

Bul týraly búgin "Qazaqstan Respýblıkasyndaǵy etnosaralyq qatynastar salasyn quqyqtyq retteý" máseleleri talqylanǵan dóńgelek ústel barysynda QR Prezıdent Ákimshiliginiń Qazaqstan halqy Assambleıasy hatshylyǵynyń sektor meńgerýshisi Názıpa Shanaı málim etti.

N.Shanaıdiń aıtýynsha, zańǵa engiziletin ózgerister qoǵamdyq kelisimdi nyǵaıtýǵa baǵyttalatyn bolady.

"Zańǵa ózgerister engizilýiniń sebebin aıtyp óteıin. Ózderińiz bilesizder, 1995 jyly Qazaqstan halqy Assambleıasy qurylǵan kezde, onyń negizgi maqsaty - Qazaqstan Respýblıkasyndaǵy etnosaralyq jáne konfessııaaralyq qarym-qatynastardy retteý bolatyn. Al, qazir, osy 20 jyl ishinde Assembleıa óz damýynda úsh birdeı kezeńnen ótti. Ol kezeńderdiń aldynda turǵan negizgi maqsattardyń bári oryndaldy. Shynynda da, búginde Qazaqstan Respýblıkasynyń aımaǵynda problema retinde kóteriletin etnosaralyq nemese konfessııaaralyq máseleler joq. Sondyqtan, Assambleıanyń endigi maqsaty - qoǵamdyq kelisimdi saqtaý" , - deıdi N.Shanaı.

Bul rette sarapshy qoǵamdyq kelisim degen túsiniktiń aıasy keń ekenin aıta kele, eń aldyńǵy ózekti máseleler retinde áleýmettik teńdikti atap ótti.

"Qoǵamdyq kelisimniń buzylýyna áleýmettik jáne ekonomıkalyq máselelerdiń yqpal etetini ras. Onyń barlyǵyn, sonyń ishinde, jastar, múmkindigi shekteýli adamdar máselelerin qamtıtyn túsinik - qoǵamdyq kelisim. Sondyqtan, zańǵa engiziletin ózgerister qoǵamdyq kelisimdi nyǵaıta túsýdi kózdeıdi" ,- dep atap ótti sarapshy.

Atap ótsek, Zańǵa engiziletin ózgeristerdi QHA-nyń Atqarýshy organy retinde belgilengen Mádenıet jáne sport mınıstrligi ázirlep, Parlament qaraýyna engizýi tıis.