Jyl sońyna deıin QazAvtoJol men Qazaqavtojoldy biriktirý protsesi aıaqtalady

NUR-SULTAN. QazAqparat – «QazAvtoJol» UK» AQ jáne «Qazaqavtojol» JShS biriktirýge qatysty qaýly jobasy ázirlendi. Bul týraly Indýstrııa jáne ınfraqurylymdyq damý mınıstrligi baspasóz qyzmetinen málimdedi, dep habarlaıdy QazAqparat tilshisi.

«Qazaqstan Úkimetiniń 2022 jylǵy 14 shildedegi keńeıtilgen otyrysynyń qorytyndysy boıynsha Memleket basshysynyń tapsyrmasyn oryndaý maqsatynda tıis is-sharalar atqaryldy. Mınıstrlik «QazAvtoJol» UK» AQ jáne «Qazaqavtojol» JShS biriktirý úshin «Respýblıkalyq menshiktiń keıbir máseleleri týraly» qaýly jobasyn ázirledi. Bul qujat jobasy bıyl tamyz aıynda Premer-Mınıstrdiń Keńsesine engiziledi. Joǵaryda atalǵan mekemelerdi biriktirý protsesin osy jyldyń sońyna deıin aıaqtaý josparlanyp otyr», - delingen mınıstrliktiń QazAqparat agenttigine bergen jaýabynda.

Vedomstvo málemetinshe, birikkennen keıin, birtutas kompanııa «QazAvtoJol» UK» AQ dep atalatyn bolady.

«Bul is-qımyl joldardy kútip ustaý boıynsha barlyq jumys barysyn tolyq baqylaýǵa alýǵa múmkindik beredi. Sonymen qatar, avtomobıl joldaryn paıdalanýshylardyń saýaldary men shaǵymdaryna jedel ári ýaqytyly den qoıýdy qamtamasyz etedi, sondaı-aq tótenshe jaǵdaılar bolǵan jaǵdaıda memlekettiń jumyldyrý daıyndyǵy deńgeıin arttyrady», - dep atalyp ótken mınıstrlik habarlamasynda.

Budan buryn habarlanǵandaı, Meleket basshysy «QazAvtoJol» jáne «Qazaqavtojoldy» biriktirip, Qazaqstannyń birtutas avtojol kompanııasyn qurýdy tapsyrdy.