Jyl sońyna deıin Qazaqstanda 15 sporttyq ǵımarat pen 16 alań salynyp bitedi - Elsııar Qanaǵatov
ASTANA. 2 jeltoqsan. QazAqparat /Jasulan Amanbaıuly/ - Jeltoqsan aıynda respýblıkada 15 sporttyq ǵımarat jáne 16 sporttyq alań paıdalanýǵa beriledi.
Bul týraly búgin Astanada baspasóz máslıhatynda QR Týrızm jáne sport mınıstrligi Sport komıtetiniń tóraǵasy Elsııar Qanaǵatov aıtty.
QR Týrızm jáne sport mınıstrliginiń málimetteri boıynsha, olardyń deni «Sergektik» respýblıkalyq is-sharasy aıasynda 4 jeltoqsan kúni eldiń birqatar oblystarynda, Astana, Almaty qalalarynda ashylmaq.
Mysaly, Almaty oblysynyń Alakól aýdany Úsharal qalasynda balalar men jasóspirimder sport mektebiniń bazasy, Іle aýdany Ótegen batyr kentinde stadıon, Atyraý oblysynda Inder, Balyqshy, Geolog, Ganıýshkıno kentterinde sport keshenderi ashylady dep josparlanǵan. El táýelsizdigi merekesine oraı, 16 jeltoqsan kúni Astanada tennıs ortalyǵy salynyp bitedi.
«Bıyl elimizde kóptegen sport alańdary men nysandar salyndy. Jyl basynan beri 24 nysan paıdalanýǵa berildi. Eger sporttyq keshender kóptep salynatyn bolsa, buqaralyq sporttaǵy halyqtyń sany kóbeıedi», - deıdi E. Qanaǵatov.
Atap aıtqanda, bıyl Qyzylordada tennıs ortalyǵy jáne Shıeli kentinde sporttyq-saýyqtyrý kesheni ashyldy. Sonymen qatar Qaraǵandy oblysynda da osyndaı eki sporttyq-saýyqtyrý kesheni turǵyzyldy. Elbasynyń qatysýymen Shymkent qalasynda jeńil atletıka ortalyǵy, Qaraǵandyda muz saraıy men tennıs korty el ıgiligine berilip otyr.
