Jyl sońyna deıin Qazaqstan-Qytaı shekara ótkeliniń jańa beketi salynady
ASTANA. QazAqparat - Jyl sońyna deıin Qazaqstan-Qytaı shekara ótkeliniń "Nur Jol" atty jańa beketi salynady, dep xabarlaıdy QazAqparat.
Bul týraly búgin QR IDM avtomobıl joldary komıteti tóraǵasynyń orynbasary Amangeldi Bekov málim etti.
"Eýrazııa qurlyǵynyń ortasynda ornalasqandyqtan, bizge tranzıttik áleýetimizdi tolyq paıdalana bilýimiz kerek. Prezıdent óziniń Joldaýynda Qazaqstan arqyly ótetin tranzıtti 5 mlrd-qa deıin jetkizýdi tapsyrdy. Shamamen 7 myń shaqyrym joldy jóndeıtin bolamyz. "Batys Eýropa - Batys Qytaı" - 2010 jyldan beri júzege asyrylyp jatqan bizdiń negizgi jobamyz. Ol qazir jumys isteı bastady dese de bolady. Qazirgi ýaqytta QHR shekarasynda "Nur Jol" ótkelin salyp jatyrmyz, ony jyldyń sońyna deıin paıdalanýǵa beremiz", - dedi ol Ortalyq kommýnıkatsııalar qyzmetinde ótken baspasóz máslıxatynda.
Ol bul shekara ótkeliniń mańyzyna toqtaldy.
"Biz Qytaıdyń Reseımen, ary qaraı Eýropamen baılanysyn qamtamasyz etemiz. Sonymen qatar Batys Eýropaǵa Ortalyq Azııa elderi: Qyrǵyzstan men Ózbekstan shyǵa alady. Qytaı men Reseı arasyn jalǵaý máselesin sheshemiz. Biz Qytaıdan Batysqa ǵana emes, Shyǵys Sibirge shyǵatyn joldardy qalpyna keltiremiz. Ol - Qytaıdy Shyǵys jáne Batys Sibirmen jalǵaıtyn Omby-Qapshaǵaı tas joly", - dedi ol.
