Jyl sońyna deıin ishki týrısterdiń sany 8 mln adamǵa jetedi - komıtet

ASTANA. QazAqparat – Jyl sońyna deıin ishki týrısterdiń sany 8 mln adamǵa jetýi múmkin. Ortalyq kommýnıkatsııalar qyzmetindegi brıfıng barysynda Týrızm ındýstrııasy komıtetiniń tóraǵasy Dastan Ryspekov atalǵan salada jyl sońyna qaraı kútiletin nátıjelerge toqtaldy, dep habarlaıdy QazAqparat tilshisi.

«Týrıstik sala bıyl eki jyldyq úzilisten keıin qarqyndy damyp keledi. Ótken jyldyń qorytyndysy boıynsha ishki týrıster sanynyń rekordtyq kórsetkishi tirkeldi, 6,9 mln adam. Bul tipti pandemııaǵa deıingi kezeńnen de joǵary. Aǵymdaǵy jyldyń birinshi jartyjyldyǵynda ishki týrıster sany ótken jylǵa qaraǵanda 50 paıyzǵa joǵary ekenin eskere otyryp, jyl sońyna deıin ishki týrısterdiń sany 8 mln adamǵa deıin ósedi dep josparlap otyrmyz», - dedi Dastan Ryspekov.

Komıtet tóraǵasynyń málimetinshe, bıylǵy 6 aıda elimizge 1,3 mln sheteldik týrıst kelgen. Olarǵa qonaq úılerde kórsetilgen qyzmet kólemi byltyrǵy jylmen salystyrǵanda 2,5 ese artqan.

Eske sala keteıik, buǵan deıin Mádenıet jáne sport mınıstrligi týrıstik salany damytýdyń 2026 jylǵa deıingi tujyrymdamasyn ázirlegen bolatyn. Oǵan sáıkes, aldaǵy 4 jylda jalpy ishki ónimdegi týrızmniń úlesi keminde 8,2 paıyzǵa jetedi