Jyl sońyna deıin ınflıatsııa deńgeıin 2 ese tómendetýimiz qajet – Smaıylov

ASTANA. QazAqparat – Baǵa ósimin ustap turý Úkimet úshin basym mindet bolyp qala beredi. Bul týraly Úkimet otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.

«Baǵa ósimin ustap turý Úkimet úshin basym mindet bolyp qala beredi. Eldegi ınflıatsııa osy jyldyń aqpanynan bastap birtindep baıaýlap keledi. Qabyldanǵan is-sharalardyń arqasynda biz ony búginde jyldyq mánde 14 paıyzǵa deıin baıaýlata aldyq. Degenmen bizdiń aldymyzda osy jyldyń sońyna deıin ınflıatsııa deńgeıin ótken jylmen salystyrǵanda 2 esege tómendetý mindeti tur», - dedi Premer-Mınıstr.

Onyń atap ótýinshe, ınflıatsııaǵa azyq-túlik taýlarlarynyń negizgi úles qosatyndysyn eskere otyryp, aldyn alý is-sharalaryn der ýaqytynda qabyldaýǵa aıryqsha nazar aýdarǵan jón.

«Ol úshin barlyq qajetti qural bar. Olar ınflıatsııa deńgeıin baqylaý jáne tómendetý jónindegi is-sharalar kesheninde kórinis tapqan. Óńir ákimderi men beıindi mınıstrlikter atalǵan qujatta josparlanǵan barlyq is-sharalardy sapaly oryndaýy tıis. Taýar baǵasyn qalyptastyrýdyń barlyq tizbegi boıynsha deldaldyq syzbany anyqtaý jónindegi óńirlik komıssııalardyń tıimdi jumysyn qamtamasyz etý mańyzdy. Bul másele ákimderdiń únemi baqylaýyna bolýy qajet. Óńir basshylary bul úshin derbes jaýapkershilik arqalaıdy», - dedi Álıhan Smaıylov.