Jyl sońyna deıin elordadaǵy barlyq jedel járdem kólikteri sary túske boıalady
ASTANA. QazAqparat - Búgin Astana qalasy jedel járdem stansasynda arnaıy dybystyq dabyly bar aq tústen sary túske boıalǵan 10 jedel járdem kóligi tanystyryldy, habarlaıdy QazAqparat qala ákimdiginiń saıtyna silteme jasap.
Astana qalasy medıtsınalyq jedel járdem stansasynyń bas dárigeri Tımýr Muratov tilshilerge jedel járdem qyzmetine qatysty engizilgen jańa standarttarmen tanystyryp, sanıtarly kólikti jaryq shaǵylystyratyn kúlgin elementteri bar sary túske boıaýdyń sebepterin túsindirdi.
«Bizdiń eldiń mamandary halyqaralyq tájirıbeni zerttedi. Saraptama damyǵan elderde qanyq sary túske boıalǵan jedel járdem kóliginiń kóptegen kólikter aǵymynda kózge birden túsedi. Sol sebepti de ol oqıǵa ornyna tez arada jetedi. Qazirgi tańda elimizdiń barlyq qalalarynda jedel járdem kólikteri sary túske boıalyp jatyr. Jyl sońyna deıin jedel medıtsınalyq járdem stansasynyń avtoparkindegi kólikterdiń barlyǵy osyndaı bolady», - dedi Tımýr Muratov.
Sondaı-aq, ol kólikterdiń qaı ýaqytta jáne qandaı jaǵdaıda arnaıy dybysty sıgnaldy qosatyny týraly aıtyp berdi.
«Jedel járdem kóliginiń arnaıy dabyldy qurylǵysy tańǵy 8:00-den 23: 00-ke deıin qosylatyn bolady. Ony tek qana naýqasty tasymaldaǵan kezde, naýqasqa bara jatqan kezde qosýǵa bolady. Basqa ýaqytta eger brıgada jumysyn bitirip, bazaǵa qaıtyp bara jatsa, onda barlyq sıgnaldar óshirilip turady. Saǵat 23-ten keıin arnaıy dabyly emes, onyń tek jaryq shaǵylystyrýshy qurylǵysy ǵana qosylady», - dep málimdedi Tımýr Muratov.
Esterińizge sala keteıik, QR Densaýlyq saqtaý mınıstrliginiń buıryǵyna sáıkes 2018 jyldan bastap barlyq jedel járdem kólikteri biryńǵaı standarttarǵa saı sary túske boıalýy tıis.
