Jyl sońyna deıin elimizde 900 km jol jańartylady
ASTANA. QazAqparat - Búgingi tańda «Nurly jol» baǵdarlamasynyń sheńberinde 16 joba iske asyrylýda, olar negizinen avtomobıl joldary salasyndaǵy jobalar.
Búgin bul týraly QR Úkimetiniń májilisinde QR Investıtsııalar jáne damý mınıstri Áset Isekeshev málimdedi.
Esterińizge salaıyq, 2015-2019 jyldarǵa arnalǵan «Nurly jol» ınfraqurylymdy damytý memlekettik baǵdarlamasy daǵdarysqa qarsy sıpatqa ıe - ol halyqty jáne bıznesti qajetti ınfraqurylymmen qamtamasyz etedi, otandyq qurylys materıaldaryn óndirýshilerdiń damýyn kótermeleıdi, jańa jumys oryndaryn qurady.
2015 jyly jumystar 11 jobanyń ishinen 8-i avtomobıl joldary salasyndaǵy jobalarda júrgizildi, olar: «Batys Evropa - Batys Qytaı», «Ortalyq-Ońtústik», «Ortalyq-Shyǵys», «Beıneý-Aqtaý», «Almaty - Óskemen», «Astana - Petropavl», «Aqtóbe-Atyraý» jáne «Oral-Kamenka» tas joldary. Barlyǵy 2 myń shaqyrym jerge jol salynsa, 75 myńdaı adam jańa jumys oryndarymen qamtylmaq. Osy rete aıta ketý kerek, 2015 jyl qorytyndysy boıynsha, elimizde 456 km jol salyndy jáne qaıta jańartyldy.
«2016 jyly jumystar joǵaryda atalǵan 8 jobada jalǵastyryldy, olarda 1,7 myń shaqyrym qamtyldy. Jyl qorytyndysy boıynsha 900 shaqyrymnan astam joldardy qaıta jańartý josparlanýda. Eldiń barlyq avtomobıl joldaryn salýǵa 100 myńǵa jýyq adam tartylatyn bolady», - dep atap ótti mınıstr.
Ol sondaı-aq, Qorǵastan Qyzylordaǵa deıingi aralyqty qamtıtyn tas joldyń da salynatynyn aıtyp ótti.
«Batys Eýropa - Batys Qytaı» jobasyn júzege asyrǵaly 2 028 shaqyrym jol ýchaskesinde jumystar aıaqtaldy jáne Shymkentten RF shekarasyna deıin Orynbor baǵytynda, jáne Taraz-Almaty ýchaskeleri boıynsha qozǵalys ashyldy. Aǵymdaǵy jylda Almaty -Qorǵas (304 shaqyrym) Shymkent - Tashkent (100 shaqyrym) jáne Shymkent - Jambyl oblysy shekarasy (81 shaqyrym) ýchaskelerinde jumystar jalǵasyp jatyr. Bul ýchaskeler jyl qorytyndysy boıynsha tolyǵymen aıaqtalady jáne dálizdiń tolyq boıynda qozǵalys ashylady», - dedi mınıstr.
Onyń sózine qaraǵanda, Almaty-Bishkek tas jolynda kólik aǵymynyń eki ese artýyna baılanysty Uzynaǵash-Otar ýchaskesinde 4 jolaqty I-tehnıkalyq sanatqa aýysý josparlanady. Ýchaskeni qarjylandyrý Dúnıejúzilik Bank qaryzynan únemdeý esebinen iske asyrylatyn bolady.
«Qorytyndysynda Qorǵastan Qyzylordaǵa deıin birinshi sanatty tas joly salynady, bul óz kezeginde jol apatyn tómendetýge septigin tıgizedi»,-dedi Á. Isekeshev.
Aıta keteıik, Qazaqstannyń kólik-logıstıka keshenin damytý Qazaqstan Respýblıkasynyń QHR jáne Evropa elderi sııaqty asa iri saýda áriptesteri arasyndaǵy tıimdi geografııalyq jaǵdaıyn eskere otyryp, el ekonomıkasynyń basym baǵyttarynyń biri bolyp tabylady. Qazaqstan Ortalyq Azııa óńiriniń iri iskerlik jáne logıstıkalyq habyna aınalý mindetin alǵa qoıdy.
