Jyl sońyna deıin elimizde 21 halyqaralyq sport týrnıri ótedi

ASTANA. QazAqparat – Bıylǵy jyl sońyna deıin Qazaqstanda balalar-jasóspirimder jáne parasport jarystaryn qosa alǵanda, túrli kólemdegi 21 halyqaralyq týrnır ótedi. QazAqparat bul týraly Mádenıet jáne sport mınıstrligine silteme jasap habarlaıdy.

Atap aıtqanda, elimizde badmıntonnan Kazakhstan International Series 2023 halyqaralyq týrnıri (qazan-qarasha), sondaı-aq bokstan Ǵalym Jarylǵapovty eske alýǵa arnalǵan erler men áıelder arasyndaǵy týrnır (jeltoqsan) josparlanǵan. Sonymen qatar erkin kúresten D.Qonaev atyndaǵy halyqaralyq jarys (qazan-jeltoqsan), jeńil atletıkadan A.Tuıaqovtyń júldesine arnalǵan halyqaralyq týrnır (jeltoqsan), ústel tennısinen 2023 WTT contender Almaty (29 tamyz — 3 qyrkúıek) jarystary jáne basqa da sport saıystary bar.

Olımpıadalyq emes sport túrlerinen: armrestlıngten álem chempıonaty (tamyz-qyrkúıek), djıý-djıtsýdan AJP Tour Astana Championship halyqaralyq týrnıri uıymdastyrylady.

Parasport: voleıboldan Azııa chempıonaty (shilde) ótedi.

«Halyqaralyq týrnırlerdi uıymdastyrýdyń birneshe maqsaty bar. Eń aldymen, bul sportqa degen jalpy qyzyǵýshylyqty arttyrý jáne ony tanymal etý. Sondaı-aq mundaı jarystar bizdiń sporttyq ınfraqurylymymyzdy paıdalanýǵa, onyń álemdik standarttarǵa sáıkestigin tekserýge múmkindik beredi. Al sportshylarymyz joǵary deńgeıde qundy tájirıbe alady. Árıne, osyndaı is-sharalardy uıymdastyrý kezinde biz shyǵyndardy barynsha azaıtýǵa basa nazar aýdaramyz», - dedi QR MSM Sport jáne dene shynyqtyrý isteri komıtetiniń tóraǵasy Erbol Myrzabosynov.