Jyl sońyna deıin elektrosamokattardyń qozǵalysyna qatysty zań qabyldanady
«Bul másele birinshi jyl talqylanyp otyrǵan joq. Bul Almaty halqynyń kóbi elektrosamokattardy belsendi paıdalana bastaǵanymen baılanysty týyndady. Biz máseleni úsh jyl talqylaı kele, zańnamalyq negizde ózgerister engizýdi, elektrosamokattarǵa qoıylatyn standarttardy bekitý sheshimin qabaldadyq. Standarttar qabyldanǵannan keıin jol qozǵalysy týraly zańǵa, jol qozǵalysy erejelerine jáne Ákimshilik kodekske ózgerister engizetin bolamyz», - dedi Jandos Muratálıev.
Onyń aıtýynsha, bekitilgen standartta samokattardy sertıfıkattaý jáne olardyń qozǵalysyn retteý sharalary kórsetilgen.
«Bolashaqta «Jol qozǵalysy týraly» Zańda biz elektrosamokattyń júrgizýshisi kim ekenin, onyń qandaı quqyqtary bar ekenin kórsetemiz. Bul normalar basqa memlekettik organdarmen jáne jurtshylyqpen talqylanatyn bolady. Osy standartty qabyldaý kezinde ýrbanısterdiń, blogerlerdiń, jurtshylyqtyń pikirleri eskerildi», - dep atap ótti Ákimshilik polıtsııa komıteti tóraǵasynyń orynbasary.
Spıker elektrosamokattardy basqarý úshin júrgizýshi kýáligi talap etilmeıtinin jetkizdi. Alaıda, mindetti shart - eger azamat elektrosamokatpen velosıped nemese kólik jolyna shyǵatyn bolsa, onda ol 16 jasqa tolýy tıis. Sonymen qosa, elektrosamokattar túngi ýaqytta júrýge múmkindik beretin jaryqtarmen jabdyqtalýy kerek.
Brıfıng aıasynda Jandos Muratálıev elimizde engizilgeli otyrǵan «Ortasha jyldamdyq» júıesiniń qalaı jumys isteıtinin aıtty.