Jyl sońyna deıin dızeldi bırja arqyly satý jolǵa qoıylady

NUR-SULTAN. QazAqparat – QR Energetıka mınıstrligi tórtinshi toqsanda dızel otynyn bırja arqyly satyp bastamaqshy. Ortalyq kommýnıkatsııalar qyzmetinde Munaı tasymaldaý jáne óńdeý departamentiniń dırektory Baýyrjan Sálimgereev osyndaı málimet berdi, dep habarlaıdy QazAqparat tilshisi.

«Álemdik tájirıbe janarmaı baǵasyn belgileýdiń neǵurlym tıimdi jáne ashyq tetigi bırjalyq saýda ekenin kórsetip otyr. Bizde birneshe jyldan beri munaıdan suıytylǵan gaz elektrondyq saýda alańdarynda satylyp keledi. Janar-jaǵarmaı boıynsha mınıstrlik Báselekelstikti qorǵaý jáne damytý agenttigimen birlesip, osy baǵytta josparly jumystar júrgizýde. Osy jyldyń naýryz aıynan bastap benzın osyndaı jolmen satylyp otyr. Tórtinshi toqsanda dızeldi bırjalyq saýda alańyna shyǵarý josparlanýda», - dedi Baýyrjan Sálimgereev.

Sondaı-aq, ol oraq naýqanynda sharýalardy dızel otynymen qamtamasyz etý úshin Pavlodar munaı-hımııa zaýytyndaǵy jóndeý jumystary shegerilgenin málim etti.

«Aýyl sharýashylyǵy taýaryn óndirýshilerdi dızel otynymen qamtamasyz etý kezinde olqylyqtar bolmaý úshin Pavlodar munaı-hımııa zaýytynda josparly jóndeý jumystarynyń ýaqyty shegerildi. Bastapqyda jóndeý jumystaryn 24 shildede bastalyp, 24 kún boıy jalǵasady dep josparlanǵan bolatyn. Endi jóndeý aǵymdaǵy 1 qazanda bastalady. Biraq josparly jóndeý jumystaryn túbi bir júrgizbese bolmaıdy. Óıtkeni zaýyttyń odan ári qaýipsiz jumys isteýi jóndeý jumystaryna táýeldi», - dedi Baýyrjan Sálimgereev.