Jyl sońyna deıin azyq-túlik taýarlary baǵasy qansha kólemde ósedi
«Bizdiń baǵalaýymyzsha, áleýmettik mańyzy bar azyq-túlik taýarlary baǵasynyń ósýi turaqtanady jáne jyl sońyna deıin 6 paıyzdan aspaıdy. Bul boljam barlyq qoldanystaǵy faktorlardy jáne baǵany turaqtandyrý boıynsha joǵaryda atalǵan memleket qabyldaǵan sharalardy eskere otyryp jasaldy. Tutastaı alǵanda, órkenıetti bólshek saýda men saýda ınfraqurylymyn damytý boıynsha júrgizilip jatqan júıeli jumys, aınalym shemasyn qarjylandyrý, áleýmettik mańyzy bar azyq-túlik taýarlaryna baǵalardy tejeý jónindegi jol kartasy aıasyndaǵy jumystardyń monıtorıngi men úılestirilýin kúsheıtý, «Azyq-túlik korporatsııasy» resýrstaryn utymdy bólýdi qamtamasyz etý baǵany turaqtandyrýdyń negizgi faktorlary bolyp sanalady», - dedi mınıstr Úkimet otyrysynda.
Onyń sózine qaraǵanda, naryq tarapynan baǵanyń tómendeýine birinshi kezekte aýyl sharýashylyǵyndaǵy óndiris kóleminiń ósýi men órkenıetti bólshek saýda damýy oń áser etedi.
«Baǵalardy onlaın rejımde monıtorıngileý úshin mınıstrliktiń aýmaqtyq bólimsheleri men ákimdikter dosmart.kz onlaın júıesin paıdalanady. Bul júıe ML tehnologııalarymen óńdeýge jáne 1% kesh-bek alýǵa arnalǵan foto chekterdi qosa, jeke tulǵalardan ózekti derekterdi jınaýdy qamtamasyz etýge, sondaı-aq dúkenderde baǵalar men ónimderdiń bar-joǵyn monıtorıngileýdi júzege asyrýǵa múmkindik beredi», - dep toqtaldy B. Sultanov.
Qazirgi ýaqytta baǵany turaqtandyrý sheńberinde Mınıstrlik mynadaı júıeli jumystar júrgizýde: statsıonarlyq emes saýda bazarlaryn jańǵyrtý jáne saýda jabdyqtaryn satyp alý úshin uzaq merzimdi qarjylandyrýǵa qol jetkizýdi qamtamasyz etý; elektrondyq saýdany damytý jónindegi sharalar keshenin ázirleý; Ulttyq taýar ótkizý júıesin qurý boıynsha jumys júrgizilýde.
Budan buryn habarlanǵandaı, 2020 jyldyń basynan áleýmettik mańyzy bar azyq-túlik taýarlarynyń baǵasy 4,4 paıyzǵa ósti.
